Depýtat ǵylymdy qarjylandyrý merzimin 10 jylǵa uzartýdy usyndy
ASTANA. KAZINFORM — Qazaqstanda aýyl sharýashylyǵy salasyndaǵy ǵylymı jobalardy qarjylandyrý merzimin qazirgi 3 jyldan 5–10 jylǵa deıin uzartý usynyldy. Bul týraly Quryltaı depýtaty Maqsat Nasıbýlov Astanada ótken halyqaralyq konferentsııada aıtty.
Elordada Dúnıejúzilik ǵylym kúnine oraı «Ortalyq Azııa elderin turaqty damytýǵa arnalǵan ǵylym, derekter jáne boljaý» atty halyqaralyq konferentsııa ótip jatyr. Іs-shara ıÝNESKO-nyń Almatydaǵy aımaqtyq keńsesimen birlesip uıymdastyryldy.
Quryltaı depýtaty Maqsat Nasıbýlov aýyl sharýashylyǵy salasyndaǵy ǵylymı zertteýlerdi qarjylandyrýdyń qazirgi merzimi uzaq ýaqytty qajet etetin jobalar úshin jetkiliksiz ekenin aıtty.
— Qazir Qazaqstanda ǵylym úsh jylǵa qarjylandyrylady. Úsh jyldan keıin ǵalymnyń konkýrstan óte alatyny nemese óte almaıtyny belgisiz. Al mysaly, bıdaıdyń jańa sortyn shyǵarý úshin 10–12, keıde 15 jylǵa deıin ýaqyt qajet. Sondyqtan meniń usynysym — aýyl sharýashylyǵy salasyndaǵy ǵylymı jobalardy qarjylandyrý merzimin 5–10 jylǵa deıin uzartý, — dedi depýtat.
Onyń aıtýynsha, bul usynystyń barlyq ǵylym salasyna qatysy joq. Agrarlyq baǵyttaǵy uzaqmerzimdi zertteýlerge turaqty qarjylandyrý tetigin qarastyrý qajet.
— Mysaly, jobany on jylǵa josparlap, qarjyny úsh jyl saıyn bólip otyrýǵa bolady. Biraq ǵalymdar men ınstıtýttar zertteýdiń aldaǵy ýaqytta da qarjylandyrylatynyn bilýi kerek. Árıne, eger jumys tıisti deńgeıde oryndalmasa, qarjyny basqa ǵalymdarǵa nemese ınstıtýttarǵa berý múmkindigi de qarastyrylýy tıis, — dedi dedi depýtat.
Ol úsh jyldyq merzim aıaqtalǵannan keıin ǵylymı joba qaıta qarjylandyrylmasa, buǵan deıin jumsalǵan qarajat pen istelgen jumystyń nátıjesiz qalý qaýpi bar ekenin atap ótti.
Maqsat Nasıbýlov bul usynystyń aýyl sharýashylyǵy salasyndaǵy ǵalymdarmen jáne mamandarmen kezdesý barysynda kóterilgenin aıtty. Aldaǵy ýaqytta máseleni Quryltaı depýtattarymen jáne tıisti memlekettik organdarmen talqylaý josparlanyp otyr.
Aıta keteıik, halyqaralyq konferentsııaǵa Ortalyq Azııa elderinen memlekettik organdardyń, ǵylymı uıymdardyń ókilderi, sarapshylar men zertteýshiler qatarynan 70-ten astam adam qatysyp jatyr. Jıynda klımattyń ózgerýine beıimdelý, tsıfrlyq transformatsııa jáne strategııalyq boljaý salalaryndaǵy óńirlik yntymaqtastyqty nyǵaıtý máseleleri qaraldy.
Eske salaıyq, buǵan deıin Qazaqstanda ǵylymı zertteýlerge qarjy bóletin bıznes ókilderine salyqtyq jeńildikter qarastyrylǵany habarlandy.
