Depýtat energııa qaýipsizdigi salasyndaǵy kemshilikterdi atady

ASTANA. KAZINFORM – Senator Bekbol Orynbasarov óziniń depýtattyq saýalynda energetıka salasynda problemalar kóbeıip kele jatqanyn aıtty.

Onyń sózine qaraǵanda, sarapshylar men ınjenerler jáne kásiporyn ókilderinen kelgen kóptegen ótinishter qurylys-jóndeý jumystarynyń qıyndap bara jatqanyn, bilikti kadrlardyń tapshylyǵyn, satyp alýda jymysqylyqtyń basymdyǵyn kórsetedi.

Senator sońǵy jyldary elektr qýaty naryǵyna 500 mlrd teńgeden astam qarjy salǵan kezde odan alynǵan qýat shamamen 1%-ǵa ǵana óskeni óreskel jaǵdaı ekenine nazar aýdardy. Onyń pikirinshe, bul qarjy jumsaý júıesiniń buzylǵanyn jáne ondaǵy tıimsizdik kózge uryp turǵanyn kórsetedi.

Sonymen qatar depýat jóndeý jumystary belgili bir kompanııalarǵa atústi isteı salý men paıda kózine aınalyp bara jatqanyn, al jabdyqtardyń naqty jaǵdaıy nasharlaı beretinin atap ótti.

Senator atap ótkendeı, tenderler kóbinese naqty básekelestiktiń aýylynan alys júredi – kelisimsharttar tehnıkalyq bazasy men mamandary joq deldaldarǵa tap bolady, bul jumys sapasyn tómendetedi jáne bilikti mamandardy naryqtan shyǵarady.

- Elektr stantsııalarynda iske qosý-retteý jáne rejımdik-retteý jumystarynyń jaǵdaıy erekshe alańdatyp otyr. Bul qazandyqtar, týrbınalar jáne jylý jelileriniń qaýipsiz ári turaqty jumysyna tikeleı táýeldi bolatyn negizgi kezeń. Alaıda, Qazaqstanda qyzmettiń bul túri is júzinde rettelmeıdi: biliktilikke qoıylatyn biryńǵaı talaptar, lıtsenzııalaý jáne kadr daıarlaý júıesi joq. Nátıjesinde, mamandardyń baǵalaýy boıynsha elimizde mundaı jumystardy tıisti deńgeıde oryndaýǵa qabiletti 4-5 kásibı ınjenerlik komanda qaldy, bul memlekettiń energetıkalyq qaýipsizdigi úshin óte az. Onyń bári jóndeý sapasynyń tómendeýine, apattyń ósýine, jabdyqtyń tez tozýyna, otyn shyǵynynyń ulǵaıýyna, sonyń saldarynan elektr jáne jylý energııasynyń ózindik qunynyń ósýine ákeledi», - dedi Bekbol Orynbasarov Senattyń jalpy otyrysynda.

Senator osyǵan baılanysty jaǵdaıdy jan-jaqty taldaýdy, qarjyny ıgerý tıimdiligin baǵalaýdy usyndy. Ol sondaı-aq tek baǵaǵa ǵana emes, biliktilik, tájirıbe jáne resýrstardyń qoljetimdiligine nazar aýdara otyryp, satyp alý júıesin qaıta qaraý qajet dep sanaıdy. Odan basqa, osyndaı jumystarǵa ruqsat berýge naqty talaptar engizý men maman daıarlaý jáne attestattaý júıesin jasaý usynyldy.

Aıta keteıik, qazaqstandyq ǵalymdar jańa býyndaǵy energııa jınaqtaýǵa arnalǵan MXene nanomaterıaldaryn zerttep jatyr.