Depýtat eńbekke baýlý týrasynda: balalar azyq-túlik dúken sóresinde ósedi dep oılaıdy

ASTANA. KAZINFORM –  Májilis depýtaty Anas Baqqojaev qalalardaǵy mektep oqýshylaryn aýyl sharýashylyǵy kórmelerine jıi aparýdy usyndy.

- Biz keńestik kezeńde mektepte oqydyq. Sol kezde jyl saıyn kúzde balalar aýyl sharýashylyǵy jumystaryna baratyn. Aýyl turǵyndary osyny jaqsy biledi. Aýyldaǵy balalar sharýanyń ónimdi alý úshin mańdaı terin tógip júrgenin, ónim qalaı alynatynyn biledi. Qazir halyqaralyq konventsııaǵa baılanysty balalardyń eńbegine tyıym salýdy qabyldadyq. Biraq qazir jastarǵa qarasaq, ysyrapshyl. Dalada kartop nemese sábiz jatsa, jerden alyp kótermeıdi. Sonymen qatar, azyq-túliktiń bári egistikte emes, dúken sóresinde ósedi dep oılaıdy. Sondyqtan mektep oqýshylaryn, stýdentterdi aýyl sharýashylyǵyna nege jumyldyrmaımyz?! Jumys istesin dep aıtyp turǵan joqpyz. Biraq aýyl sharýashylyǵyna qatysty túrli tegin kórmelerge barǵany durys bolar edi. Jyl saıyn osyndaı 4-5 kórme uıymdastyrylady, - dedi A.Baqqojaev Májilistiń jalpy otyrysynda.

Onyń paıymynsha, balalar osy kórmelerde tehnıkamen tanysyp, maldy baǵý jumystarynan jalpy túsinik alady. Óz kezeginde QR Oqý-aǵartý vıtse-mınıstr Edil Ospan balalardy eńbekke baýlý qazir jańa formada júzege asyrylyp jatqanyn aıtty.

- Oqýshylar eńbek páni aıasynda tálim alyp jatyr. Sondaı-aq mekteptiń aınalasynda jylyjaılardy qurý boıynsha jumysty atqaryp otyrmyz. Osy is-sharalar tárbıe jumysy baǵytynda uıymdastyryldy. Qazir balalardy aýyl sharýashylyǵyndaǵy daladaǵy eńbekke jappaı tartý usynysyn qoldamaımyz. Atap aıtqanda, oqýshylardy eńbek alańdarynyń qyzmetimen tanystyrýdy, kórmelerge barýyn uıymdastyramyz, - dedi vıtse-mınıstr.

Onyń sózine qaraǵanda, bıyl jumysshy mamandyqtar jyly aıasynda tıisti is-sharalar bekitilgen. Bul turǵyda joǵary synyp oqýshylaryn óndiris alańdaryna alyp barý eskerilgen.

Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine mádenıet jáne bilim berý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.