Depýtat eńbek ótili negizindegi zeınetaqy úlgisine kóshýdi usyndy
ASTANA. KAZINFORM – Senator Amangeldi Nuǵmanov óziniń depýtattyq saýalynda jasqa baılanysty zeınetaqy taǵaıyndaý úlgisinen eńbek ótiline negizdelgen júıege kezeń-kezeńimen kóshýdi usyndy.
Senator Qazaqstan memlekettik saıasattyń basym baǵyty – adam jáne adamı kapıtaldy damytýǵa qatysty jańa damý kezeńine kirgenin atap ótti.
Onyń pikirinshe, osyǵan baılanysty Áleýmettik kodeksti, eń aldymen zeınetaqymen qamsyzdandyrý bóligindegi erejelerdi jańarǵan konstıtýtsııalyq qadamdarǵa jáne eńbek naryǵynyń qazirgi jaǵdaıyna sáıkes keltirý qajet.
Depýtat adam jasyna baılanysty zeınetaqyny taǵaıyndaý úlgisinen eńbek ótiline negizdelgen júıege kezeń-kezeńimen kóshýdi qarastyrýdy oryndy dep sanaıdy. Bul rette azamattarǵa osy sheshim úshin ekonomıkalyq jaýapkershilikti ózine ala otyryp, qajet eńbek ótiline jetkennen keıin zeınetke shyǵý sátin derbes aıqyndaý quqyǵy berilýi múmkin.
- Bul reformany iske asyrýdaǵy kútiletin nátıje – jumyssyzdyq deńgeıin tómendetý, masyldyq kózqarasty qysqartý men enjarlyqty yntalandyrmaý jáne merziminen buryn ekonomıkalyq belsendilikten negizsiz shyǵýdy boldyrmaý men azamattardyń eńbekke jaýapkershilikpen qaraýyn qalyptastyrý, sondaı-aq memlekettik bıýdjet pen Biryńǵaı jınaqtaýshy zeınetaqy qoryna aýyrtpalyqty azaıtý esebinen zeınetaqy júıesinde aýqymdy qarjy teńgerimdiligin qamtamasyz etý bolady», - dedi Amangeldi Nuǵmanov Senattyń jalpy otyrysynda.
Senator zeınetaqy zańnamasyndaǵy olqylyqqa – múgedektik belgilenbeı densaýlyq jaǵdaıy boıynsha merziminen buryn zeınetke shyǵý tetiginiń bolmaýyna erekshe nazar aýdarady.
Onyń aıtýynsha, qazirgi júıe ústirt túrde múgedektikti tanýǵa baǵyttalǵan jáne sozylmaly, kásiptik jáne órship bara jatqan aýrýy bar azamattar aýqymyn qamtymaıdy, bul olardyń eńbekke qabilettiligin is júzinde shekteıdi.
Osyǵan baılanysty Áleýmettik kodekste densaýlyq saqtaý salasyndaǵy ýákiletti organ bekitetin aýrýlar tizbesi negizinde medıtsınalyq kórsetkishter boıynsha zeınetaqy taǵaıyndaý quqyǵyn bekitý usynyldy. Bul rette, eńbekke qabilettilik qalpyna kelgen jaǵdaıda, eńbek etý quqyǵy qaıta bastalýy múmkin.
Aıta keteıik, Qazaqstanda áleýmettik tólemderdi taǵaıyndaý júıesi jańartylyp, endi járdemaqy men zeınetaqyny esepteýde jasandy ıntellekt qoldanylmaq.
