Depýtat eńbek mıgranttaryna qosymsha salyq salýdy usyndy
ASTANA. KAZINFORM — Májilis depýtaty Erlan Barlybaev Premer-mınıstr Oljas Bektenovtiń atyna saýal joldap, eńbek mıgranttaryna qosymsha salyq salý týraly usynys aıtty.
— «Eńbek resýrstaryn damytý ortalyǵy» aktsıonerlik qoǵamynyń boljamdary boıynsha, 2025-2035 jyldary jaldamaly eńbek kúshin suranys bazalyq stsenarııde 3 mln adamǵa jetedi degen esep bar. Onyń ishinde 813 myń adam jumysshy kadr bolmaq. Qazaqstandaǵy eńbekaqy deńgeıi Ortalyq Azııa elderi arasynda eń joǵary bolyp otyr jáne aımaqtaǵy ortasha kórsetkishterden aıtarlyqtaı asyp túsedi. Qazaqstanda, ásirese, qyzmet kórsetý, qurylys jáne aýyl sharýashylyǵy salasynda jumys oryndary jetkilikti. Al Eýropa men Reseı sheteldikterdi óz aýmaǵyna kirgizý erejelerin qatańdatqanyn baıqap otyrmyz. «Aqjol» partııasynyń fraktsııasy Qazaqstanǵa baýyrlas Ortalyq Azııa respýblıkalarynan eńbek mıgranttaryn tartý qajet dep sanaıdy. Alaıda, kóshi-qon aǵyndaryn biliktilikke, salyqtarǵa jáne ıntegratsııaǵa basa nazar aýdara otyryp, strategııalyq turǵydan basqarý qajet, — dedi depýtat.
Depýtat saýalynda kórshi elden keletin eńbek mıgranttaryna qoıylatyn talaptardy qaıta qaraý usynylǵan. Tipti, jumys kúshi tapshy salalarda eńbek mıgranttaryn tartý kvotasynyń sanyn ulǵaıtyp, ruqsat alý rásimderin ońaılatý kerek ekeni aıtylǵan.
— Eńbek mıgranttaryna qosymsha salyq engizip, olardyń sanyn salyqty kóterý jáne tómendetý arqyly retteý qajet, — dedi Erlan Barlybaev.
Buǵan deıin sheteldik jumys kúshin tartatyn jumys berýshilerge qoıylatyn talaptar ózgeretinin jazǵan edik.