Depýtat elimizdegi ınvestorlarǵa qolaıly qalany atady

ASTANA. KAZINFORM — Parlament palatalarynyń birlesken otyrysynda «Alataý qalasynyń arnaýly quqyqtyq rejımi týraly» Konstıtýtsııalyq zań ekinshi oqylymda qaralyp, qabyldandy. Bul týraly Jibek Joly telearnasynyń «Búgin Live» baǵdarlamasynda Májilis depýtaty Nurtaı Sabılıanov habarlady.

Almaty oblysynda boı kótergen shahar bolashaqta 2 mıllıonǵa jýyq adam turatyn, tehnologııa men ınnovatsııaǵa negizdelgen iri ortalyqqa aınalmaq.

— Alatau City — arnaıy quqyqtyq rejımmen jumys isteıtin, ınvestorlarǵa qolaıly jaǵdaı jasalǵan «aqyldy qala». Munda kólik júıesinen bastap, kommýnaldyq qyzmetterge deıin zamanaýı júıemen basqarylady, — dedi depýtat.

Spıkerdiń sózinshe, qalada jańa basqarý formaty engiziledi.

— Qujatqa saı, Alataýdaǵy eń joǵary basqarý organy — Qala keńesi bolady. Ol shahardyń strategııalyq damý baǵytyn aıqyndap, memlekettik organdar jumysyn úılestiredi. Keńes quramyn Prezıdent bekitedi, al oǵan Premer-mınıstr tóraǵalyq etedi. Negizgi atqarýshy organ retinde Ákimshilik qurylmaq. Ol memlekettik qor nysanyndaǵy memlekettik organ retinde jumys isteıdi. Ákimshilikke kásipkerlikti damytý, ınvestıtsııalyq jobalardy retteý jáne ınfraqurylymdyq ósimdi úılestirý quzyreti beriledi, — dep atap ótti Nurtaı Sabılıanov.

Zań jobasy Alataýdyń óz aktilerin qabyldaýyna jol ashady. Áńgime ınvestıtsııalyq qatynas, kásipkerlik, qala qurylysy jáne tsıfrlyq ákimshilendirý salalary jóninde bolyp otyr.

— Jańa zań Alataýda bólek ekonomıkalyq ári basqarý júıesin qalyptastyrýdy kózdeıdi. Qala endi ózindik qarjy modeli, arnaıy salyqtyq jaǵdaıy jáne tyń ákimshilik qurylymy bar derbes ekojúıe retinde qarastyrylady. Bul — bolashaqtyń, jastardyń qalasy, ınvestorlarǵa qolaıly óńir, — dedi depýtat.

Aıta keteıik, Alataý qalasyn damytýdyń negizgi baǵyttarynyń biri — shaǵyn avıatsııany damytý bolmaq.