Depýtat elimizdegi mektepterdiń kúzetine qatysty pikir bildirdi

NUR-SULTAN. QazAqparat – Májilistiń jalpy otyrysynda depýtat Andreı Lınnık el aýmaǵyndaǵy mektepter men balabaqsha qaýipsizdigin kúsheıtýge qatysty usynys aıtty. Osy oraıda ol Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.

«Qazan qalasynda bolǵan qaıǵyly oqıǵa úreı týdyrǵany anyq. 19 jastaǵy adamnyń qolynan muǵalimder men oqýshylar qurban boldy. Zardap shekkenderdiń týystary men jaqyndaryna qaıǵyryp kóńil aıtamyz», - dedi depýtat.

Onyń aıtýynsha, mektepterdegi kúzet fýntsııalaryn kóbine zeınet jasyndaǵy vahterler atqaryp keledi.

«Olarmen sypaıy ári senimdi negizde sóılesý ǵımaratqa kedergisiz kirýge jetkilikti bolady. Al eger qastandyq jasaý nıetinde kelgen adam bolsa, egde jastaǵy kúzetshi oǵan qandaı qarsylyq kórsete alady?», - dedi Andreı Lınnık.

Osy oraıda ol mektepter men mektepke deıingi mekemeler jáne olardyń aýmaǵyndaǵy jerlerde qaýipsizdik tıisti deńgeıde emes ekenin aıtty.

«Qazandaǵy jaǵdaıǵa toqtalsaq, mektep aýmaǵyna bóten adam kirgen bolatyn. Biraq basqa elderde osyǵan deıin bolǵan oqıǵalarda áleýmettik jeli men kompıýter oıyndar yqpalymen oqýshylardyń ózderi osyndaı qylmysqa baryp jatatynyn kórdik», - dedi depýtat.

Osyǵan baılanysty depýtattyq saýalda birqatar usynystar aıtyldy.

Birinshiden, oqýshylar syıymdylyǵyna qaramastan, bilim berý nysandarynyń antıterrorıstik qorǵanys júıesine talaptardy qaıta qaraý máselesi kóterildi.

Ekinshiden, qoǵamdyq oryndardy kúzetetin kúzet qyzmetteriniń qyzmetkerlerine qarý ustaýǵa jáne olarǵa múliktik keshendi ǵana emes, sonymen qatar adamdardyń qaýipsizdigin de kúzetýdi júzege asyrý mindetin júkteýge ruqsat berý usynysy aıtyldy.

Úshinshiden, mektep psıhologtarynyń jumysyn kúsheıtý kerek ekeni jetkizildi.

Tórtinshiden, atys qarýyn alyp júrý men saqtaýǵa ruqsat berýge qadaǵalaýdy kúsheıtý kerektigi aıtyldy.

Budan buryn habarlanǵandaı, 11 mamyrda Qazan qalasyndaǵy mektepte qylmysker oq jaýdyryp, adamdar qurban boldy. Búgin QR Bilim jáne ǵylym mınıstri Ashat Aımaǵambetov Tatarstannyń Qazan qalasynda bolǵan jaǵdaıǵa baılanysty elimizdegi aǵymdaǵy jaǵdaıǵa taldaý júrgizýdi jáne jaqyn arada balalardyń qaýipsizdigin qamtamasyz etý boıynsha barlyq deńgeılerde qosymsha keshendi sharalar qabyldaýdy tapsyrdy.

«Biz osy qaıǵyly oqıǵalardan sabaq alýymyz kerek. Keshe osy máseleler boıynsha keńes ótkizdim. Aǵymdaǵy jaǵdaıǵa taldaý júrgizýdi jáne jaqyn arada balalardyń qaýipsizdigin qamtamasyz etý boıynsha barlyq deńgeılerde qosymsha keshendi sharalar qabyldaýdy tapsyrdym», dep jazdy mınıstr.