Depýtat elimizde veıpterdi satýǵa tyıym salýdy surady

ASTANA. QazAqparat – Búgin Májilistiń jalpy otyrysynda depýtat Nurgúl Taý jasóspirimder arasynda veıpter keńinen tarap jatqanyn aıtty, dep habarlaıdy QazAqparat tilshisi.

«Qazirgi kezde elimizde quramynda belgisiz hımııalyq zattar men nıkotınniń edáýir mólsheri, veıpterdiń balalar men jastar arasynda joǵary qarqynda taralýy epıdemııa sıpatynda desek bolady. QR Qarjy mınıstrliginiń málimetine sáıkes, 2020 jyldan bastap «veıp» sharyǵy 292 esege ósti. Dúnıejúzilik densaýlyq saqtaý uıymynyń 2018 jyly Qazaqstanda júrgizgen zertteýiniń qorytyndysyna sáıkes, 15 jastaǵy uldardyń 14 paıyzy, qyzdardyń 6 paıyzy elektrondy temekini bir ret qoldanyp kórgen. 11-15 jas aralyǵyndaǵy uldardyń 8,5 paıyzy, qyzdardyń 3,8 paıyzy veıpti turaqty túrde alǵan», - Nurgúl Taý Úkimet basshysy Álıhan Smaıylovtyń atyna joldaǵan saýalynda.

Onyń aıtýynsha, 2022 jyly júrgizilgen zertteýler boıynsha 2018 jylǵy derektermen salystyrǵanda jasóspirimder arasynda

veıpter keńinen tarap jatqany anyqtaldy.

«Ásirese, eki ese ósim 13-15 jas aralyǵyndaǵy balalalar arasynda baıqaldy. Jalpy, veıpti alǵan balalar sany 1 mıllıonǵa jetken. Bıznestiń joǵary tabysyn eskersek, veıp boıynsha balalar men jasóspirimderge baǵyttalǵan marketıng qoldanylyp keledi. Bul turǵyda veıpterdiń ortasha eseppen 2000 teńgeden aspaıdy», - dedi depýtat.

«Joǵaryda aıtylǵandardyń negizinde, depýtattyq saýalda qoıylǵan máselelerdi qaraýǵa jáne elimizde veıpter men onyń basqa túrlerin satýǵa tolyǵymen tyıym salý múmkindigin qarastyrý usynysyn jasaımyz», - dedi ol.