Depýtat elimizde mýnıtsıpaldyq polıtsııa týraly zańnyń qashan paıda bolatynyn aıtty
ASTANA. QazAqparat - Mýnıtsıpaldyq polıtsııa týraly zań 2017 jyldan keıin ǵana paıda bolady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Májilis depýtaty Ramazan Sárpekov málim etti.
Depýtattyń aıtýynsha, mamyr aıynyń bas kezinde Úkimettiń keńeıtilgen otyrysynda osy máseleni kótergen bolatyn. Májilis jumys toptarynyń otyrystarynda jergilikti, ıaǵnı mýnıtsıpaldyq polıtsııa qurý máselesi talqylanyp, birneshe nusqada qarastyrylýda. Mýnıtsıpaldyq polıtsııa búgingi ishki ister mınıstrligi júıesiniń jalpy quramynyń úshten bir bóligin quraıdy jáne jol qozǵalysy erejeleriniń saqtalýy men qoǵamdyq tártipti qamtamasyz etedi.
«Sondyqtan qyzmetkerlerdiń fýnktsııasy jergilikti atqarýshy organdarǵa nemese jergilikti ózin-ózi basqarý organdaryna beriledi. Degenmen olar ishki ister organdarynyń qyzmetkerleri retinde saqtalady. Eń aldymen Qazaqstannyń úsh oblysynda jergilikti polıtsııany synaq túrinde engizý usynysy boldy. Jergilikti polıtsııany synaq túrinde engizý máselesi áli talqylanady, biraq mýnıtsıpaldyq polıtsııany quratyn bolsaq, ony búkil el aýmaǵynda engizgen jón degen toqtamǵa kelip otyrmyz», - dep atap ótti R. Sárpekov.
Depýtattyń aıtýynsha, mýnıtsıpaldyq polıtsııa týraly zańdy ázirleýge ýaqyt kerek, sondyqtan zań 2017 jyldan keıin ǵana daıyn bolady.
«Bıyl zańnamalyq baza daıyndalady, zań 2016 nemese 2017 jyly ázirlenedi. Zańdy daıyndaýǵa ýaqyt qajet, sondyqtan ol 2017 jyldan keıin ǵana ázir bolady», - dedi R.Sárpekov.
