Depýtat elde medıtsınalyq zattardy satyp alýdyń zańdylyǵyn tekserýdi surady
ASTANA. KAZINFORM — Búgin Quryltaıdyń jalpy otyrysynda depýtat Asylhan Qojahmetov medıtsınalyq buıymdardy satyp alý jáne otandyq taýar óndirýshilerdi qorǵaý kezindegi zań buzý derekterine qatysty másele kóterdi. Osy oraıda ol Densaýlyq saqtaý mınıstri Aqmaral Álnazarova men Bas prokýror Berik Asylovtyń atyna depýtattyq saýal joldady.
— «SK-Farmatsııa» JShS qyzmeti, «Aq jol» fraktsııasynyń depýtattyq saýaldaryna birneshe márte sebep bolǵan bolatyn. Alaıda, farmatsevtıka salasyndaǵy kásipkerlerden kelip túsip jatqan shaǵymdardyń áli de jalǵasýy, bul máselelerdiń tolyq sheshilmegenin kórsetedi. Budan bólek, qazir másele jekelegen satyp alýlarǵa ǵana emes, satyp alý qaǵıdalaryn qoldaný tájirıbesine de qatysty jańa suraqtar týyndap otyr. Máselen, Partııaǵa «DOLCE» JShS júginip, tómendegi problemalyq máselelerge nazar aýdardy. Birinshiden, otandyq óndirýshiler «SK-Farmatsııanyń» otandyq taýar óndirýshi mártebesin rastaýǵa qatysty talaptardy ártúrli qoldanatynyn aıtyp otyr. Eger, keıbir qatysýshylardan bul mártebeni rastaý mindetti túrde talap etilse, al «basqa» qatysýshylarǵa qatysty dál osyndaı talaptar múlde qoıylmaıdy nemese postfaktým ǵana qoıylady. Satyp alý qaǵıdalary barlyǵyna birdeı bolýy tıis. Qatysýshylardy aldymen satyp alý rásimine qatysýǵa jiberip, keıin naqty jetkizýshige nemese taýarǵa qaraı qoıylatyn talaptardy is júzinde ózgertýge bolmaıdy. «SK-Farmatsııa» óz tájirıbesi boıynsha jańa talaptar belgileı almaıdy, ásirese olardy tańdamaly túrde qoldanýǵa jol berilmeýi tıis, — dedi Asylhan Qojahmetov.
Sonymen qatar ol memlekettik satyp alýǵa josyqsyz qatysýshylar tizilimine engizilgen ónim berýshilerdiń «SK-Farmatsııanyń» satyp alýlaryna qatysý máselesine toqtaldy. Tıisti qaǵıdalarda mundaı ónim berýshilerdiń satyp alýǵa qatysýyna tikeleı tyıym salynbaǵan. Bul rette bıýdjet qarajaty men MÁMS júıesiniń qarajaty jumsalatynyn eskere otyryp, osy másele boıynsha quqyqtyq tártipti naqty túsindirý qajet.
— Kásipkerlerdiń «SK-Farmatsııanyń» áreketterine qatysty Densaýlyq saqtaý mınıstrligine nemese Bas prokýratýraǵa joldaǵan shaǵymdarynyń olarda kórsetilgen shaǵym nysanynyń ózine, ıaǵnı «SK-Farmatsııaǵa», qaraý jáne jaýap daıyndaý úshin joldaý tájirıbesi erekshe alańdaýshylyq týǵyzady. «Aq jol» fraktsııasy mundaı ótinishterdi formaldy túrde qaraý tájirıbesin toqtatý qajet dep sanaıdy. Munda vedomstvolar arasyndaǵy hat almasý emes, obektıvti tekserý júrgizý, naqty mán-jaılardy anyqtaý jáne zań buzýshylyqtar anyqtalǵan jaǵdaıda, kinálilerdi zańda belgilengen jaýapkershilikke tartý qajet. Eger memleket bıznesten belgilengen qaǵıdalardy saqtaýdy talap etse, onda eń aldymen sol talaptardy ózi saqtaýǵa mindetti, — dedi depýtat.
Osyǵan baılanysty, «Aq jol» QDP depýtattyq fraktsııasy:
— «SK-Farmatsııa» JShS otandyq taýar óndirýshi mártebesin rastaýǵa qoıylatyn talaptardy birkelki qoldanýyn qamtamasyz etýdi;
— «SK-Farmatsııanyń» satyp alýlaryna memlekettik satyp alýǵa josyqsyz qatysýshylar tizilimine engizilgen sýbektilerdiń qatysý máselesine quqyqtyq baǵa berýdi;
— 2027 jylǵa medıtsınalyq zattardy satyp alýdyń zańdylyǵyn tekserýdi;
— Jeke jáne zańdy tulǵalardyń áreketterine nemese sheshimderine shaǵym jasalyp otyrǵan organdar men uıymdardyń ózderine osy ótinishterdi qaraý úshin qaıta joldaý tájirıbesine jol bermeýdi kerek dep esepteıdi.
Buǵan deıin habarlanǵandaı, 2026 jylǵa arnalǵan dárilik zattar men medıtsınalyq buıymdardy satyp alý naýqany aıasynda medıtsınalyq uıymdar jalpy somasy 567 mlrd teńgeden astam qarajatqa ótinim bergen.
