Depýtat elde áskerı feldsherlerdi daıarlaý isin kúsheıtýdi usyndy
ASTANA. KAZINFORM – Senator Ǵalıasqar Sarybaev óziniń depýtattyq saýalynda qazirgi geosaıası qaýip-qater men tótenshe jaǵdaılar ahýalynda áskerı medıtsınalyq kadrlardy daıarlaý máselesin kóterdi.
Onyń paıymynsha, áskerı dárigerler men feldsherlerdi daıarlaý júıesi jan-jaqty damýy tıis. Óıtkeni ol jedel áreket etýge, áskerı-medıtsınalyq turǵyda turaqty qamtamasyz etý men elimizdiń qazirgi zamanǵy qaýip-qaterge daıyndyǵyna tikeleı áser etedi.
- Áskerı medıtsına salasyndaǵy bastapqy medıtsınalyq kómektiń negizgi orta býyn mamandaryn - áskerı feldsherlerdi daıarlaýdy qolǵa alý qajet. Búginde Qarýly Kúshter men azamattyq qorǵanys júıesi tarapynan kadrlarǵa degen qajettilik artyp jatyr. El aýmaǵynyń kólemi, shalǵaı eldi mekenderdiń jaǵdaıy, tabıǵı jáne tehnogendik táýekelderge baılanysty mobıldi ári arnaıy medıtsınalyq mamandardy daıarlaý strategııalyq mánge ıe bolyp otyr, - dedi Ǵalıasqar Sarybaev Senattyń jalpy otyrysynda.
Senator Taldyqorǵan qalasyndaǵy medıtsınalyq kolledjderdiń bazasynda áskerı feldsherlerdi daıarlaý týraly usynys aıtty. Bul qalada áskerı garnızonnyń, gospıtaldiń jáne salalyq medıtsınalyq mekemelerdiń bolýy naqty ahýalǵa jaqyn jaǵdaıda tájirıbemen ushtastyryp oqytý men taǵylymdamany uıymdastyrýǵa múmkindik beredi.
- Taldyqorǵan joǵary medıtsınalyq kolledji bazasynda áskerı feldsherler daıarlaıtyn mamandandyrylǵan bólimshe ashý múmkindigin qarastyrýdy, múddeli memlekettik organdarǵa birlesip tıisti bilim berý modýlderi men standarttaryn ázirleý jáne engizý máselesin pysyqtaýdy, sala mamandaryna degen qajettilikti aıqyndap, memlekettik bilim berý tapsyrysyn ornalastyrýdy, jobany iske asyrý boıynsha múddeli memlekettik organdardyń fýnktsııalary men jaýapkershiligin aıqyndaı otyryp, vedomstvoaralyq úılestirýdi qamtamasyz etýdi suraımyz, - dedi senator Úkimet basshysynyń atyna joldaǵan saýalynda.
Aıta keteıik, bıyl sáýir aıynyń aıaǵynda Qorǵanys mınıstrliginiń saıtynda merzimdi áskerı qyzmet ótkergen azamattarǵa arnalǵan memlekettik bilim berý granttary ıegerleriniń tizimi jarııalandy.
