Depýtat el naryǵyndaǵy sút sapasyn synǵa aldy

ASTANA. QazAqparat - Qazaqstanda jylyna 4,7 mln. tonna sút óndiriledi, olardyń 4 mln. tonnasy jeke qosalqy sharýashylyqtardan keledi. Bul týraly búgin OKQ brıfınginde QR Parlamenti Májilisiniń depýtaty Raýan Shaekın aıtty.

«Bizdiń elimizde jylyna 4,7 mln. tonna sút óndiriledi, olardyń 4 mln. tonnasy jeke qosalqy sharýashylyqtardan keledi. Bul barlyq ónimniń 87 paıyzy degen sóz. Olardyń tek 1 mln. 300 myń tonnasy ǵana qaıta óńdeýge jiberiledi. Al qalǵan 3 mln.-ǵa jýyǵy jeke qoldanysqa: naryqqa jáne basqa maqsatqa jumsalady», - deıdi depýtat.

Sondaı-aq, halyq qalaýlysynyń aıtýynsha, keıbir kásipkerlerge tabıǵı ónimnen góri, sút untaǵymen jumys istegen tıimdirek kórinedi.

«Sonymen qatar, untaqpen jumys istegen tıimdirek bolǵandyqtan, tabıǵı sút qaıta óńdeýge túspeı jatyr. Sondyqtan búginde súttiń sapasyna qatysty birqatar máseleler bar», - deıdi R. Shaekın.