Depýtat E. Doshaev mas kúıinde kólik basqaratyndardyń sany kúrt ósip otyrǵanyna alańdaýshylyq bildirdi
ASTANA. 12 aqpan. QazAqparat - Búgin Parlament Májilisinde «Jol júrisi týraly» jańa zań jobasyn talqylaý barysynda depýtat Ergen Doshaev elimizde mas kúıinde kólik quralyn basqaratyn júrgizýshilerdiń sany kúrt óskenine alańdaýshylyq bildirdi.
Depýtattyń málimetterine qaraǵanda, eger 2011 jyly ishimdikke «sylqııa toıǵan» júrgizýshilerdiń kesirinen bolǵan jol kólik oqıǵalarynyń sany 424-ten astam bolsa, ótken jyly bul kórsetkish eki esege deıin ósip ketken. Sońǵy bes jylda jol polıtsııasy qyzmetkerleri tarapynan 330 myńnan astam mas kúıinde kólik basqarǵan júrgizýshiler ustalǵan.
«Sondyqtan bundaı óte aýyr jaǵdaıǵa alyp keletin jol qozǵalysyndaǵy júıeli keleńsizdikterdi tek qana zańnamalyq deńgeıde sheshetin ýaqyt keldi. Birinshiden, halyqaralyq tájirıbege súıenip, mas kúıinde kólik basqaratyndarǵa qylmystyq jaýapkershilikti kúsheıtý qajet. Mysaly, Qytaıda, mas kúıinde jol júrý tártibin buzǵan alǵashqy júrgizýshi atý jazasyna kesilgen. AQSh-ta kólikti mas bolyp basqarǵan adam temir tordyń arǵy jaǵynda 48 saǵattan 6 aıǵa deıin otyrýy múmkin. Eýropada mas kúıinde rýlge otyratyndar úshin salynatyn eń kóp aıyppuldy Ulybrıtanııa belgilegen. Ol elde mundaı jaǵdaıda kólik basqarý 7200 eýroǵa túsedi», - dedi E. Doshaev.
Depýtattyń aıtýynsha, japon eliniń zańnamasynda qatań jaza túrleri tek mas kúıindegi kólik basqarǵan júrgizýshige ǵana qarastyrmaıdy. Máselen, ol elde sol «qyzý» júrgizýshiniń avtokóligine otyrǵan árbir kámelet jasyndaǵy jolaýshy 3 myń AQSh dollaryna teń kólemde aıyppul tóleıtin bolǵan. Marshrýttyq jáne týrıstik avtobýstardyń jolaýshylaryna da keshirimmen qaramaǵan. Sonymen qatar, mas bolyp rýlge otyrǵan júrgizýshi keminde 8700 dollar kólemindegi aıyppul tóleıdi nemese 5 jylǵa túrmege otyrady.
«Qazaqstannyń zańnamalarynda da bundaı jaǵdaıdaǵy jaýapkershilikti arttyra túsken abzal», - dedi depýtat E. Doshaev.
