Depýtat «dástúrli qytaı medıtsınasy» týrasynda: turǵyndardan shaǵym túsip jatyr

ASTANA. KAZINFORM — Búgin Májilistiń jalpy otyrysynda depýtat Amanjol Áltaı shyǵys medıtsınasy boıynsha kelip túsip jatqan shaǵymdarǵa qatysty mınıstrlikke depýtattyq saýal joldady.

— Meniń atyma Astana qalasynan jáne basqa da óńirlerden «Shyǵys medıtsınasy», «qytaı medıtsınasy», «ıgloterapııa», «manýaldy terapııa» ataýymen qyzmet kórsetetin ortalyqtarǵa qatysty azamattardyń shaǵymdary kelip túsýde. Shaǵymdarda lıtsenzııasyz nemese tıisti biliktiliksiz medıtsınalyq qyzmet kórsetý, ınvazıvti rásimderdiń sanıtarııalyq talaptardy saqtamaı júrgizilýi, tirkelmegen preparattardyń qoldanylýy, sondaı-aq aýyr dıagnozdardy «emdeýge» ýáde berip, halyqty jańylystyratyn jarnama faktileri kórsetiledi. Keıbir ortalyqtar qysqa merzimge ashylyp, ataýyn nemese mekenjaıyn ózgertip, baqylaýdan jaltaryp jatady. Ásirese, tegi-tamyry belgisiz, ózin bilikti dáriger retinde jarnamalaǵan Qytaı Halyq Respýblıkasynyń azamattary tórt-bes aı halyqty emdegen bolyp senimine kirip, artynsha emdeý ortalyǵyn jaýyp, «ańqaý elge aramza emshi» degendeı qaltasyn qampaıtyp alyp ketip qalatyndar da kezdesedi, — dedi Amanjol Áltaı Densaýlyq saqtaý mınıstrligine joldaǵan saýalynda.

Onyń paıymynsha, bul jaǵdaılar patsıentterdiń ómiri men densaýlyǵyna tikeleı qaýip tóndirip, densaýlyq saqtaý júıesine degen senimdi álsiretedi. Qazaqstanda «dástúrli qytaı medıtsınasy» ataýymen usynylatyn qyzmetterdiń bir bóligi mazmuny jaǵynan medıtsınalyq qyzmetke jatady jáne qoldanystaǵy zańnamaǵa sáıkes lıtsenzııany, tıisti biliktilikti ári naqty talaptardy saqtaýdy qajet etedi. Alaıda shaǵymdar kóptegen nysanda bul talaptardyń is júzinde oryndalmaıtynyn kórsetýde: qyzmettiń quqyqtyq mártebesi kómeski, mamandardyń quzyreti men jaýapkershiligi aıqyn emes, al keı jaǵdaılarda klınıkalyq praktıkaǵa jiberilý tártibi tolyq rastalmaǵan shetel azamattarynyń «em júrgizýi» týraly derekter bar.

— Negizgi qaýip — patsıent qaýipsizdigi: antısanıtarııa, sterıldilik standarttarynyń buzylýy, medıtsınalyq qaldyqtardy durys joımaý jáne ınvazıvti rásimderdi qaýipsizdik hattamalarynsyz júrgizý týraly sıgnaldar jıilegen. Sonymen birge «preparat/dárýmen/qospa» retinde usynylatyn ónimderdiń tirkelýi men tańbalanýy kúmán týdyrady, al onlaın-jarnamada aýyr dıagnozdardy «emdeýge» ýáde berý faktileri patsıentti jańylystyrý táýekelin kúsheıtedi. Keı nysandardyń «tez ashylyp — qysqa merzimde jumys istep — jabylyp, kóship ketýi» josparly tekserýdiń shekteýlerin kórsetip, táýekelge negizdelgen baqylaýdy jáne vedomstvoaralyq úılestirýdi kúsheıtý qajettigin aıqyndaıdy, — dedi depýtat.

Osyǵan baılanysty ol myna naqty usynystarǵa nazar aýdarýdy surady:

1. Bul qyzmet túrlerin quqyqtyq turǵydan naqty jiktep, resmı túsindirme jarııalaýdy;

2. Invazıvti rásimder júrgizetin ortalyqtarǵa baqylaýdy kúsheıtýge;

3. Shetel azamattarynyń medıtsınalyq qyzmetin tsıfrlyq reestr arqyly mindetti túrde ashyq kórsetýge;

4. Tirkelmegen preparattar men onlaın-jarnamany vedomstvoaralyq baqylaýdy kúsheıtýge;

5. Azamattarǵa lıtsenzııany jáne dárilik zattardyń zańdylyǵyn tekserý boıynsha nysanaly aqparattyq jumys júrgizýdi jolǵa qoıýǵa.

Aıta keteıik, buǵan deıin tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý aıasynda usynylatyn medıtsınalyq qyzmetter men dárilik zattar qosylǵan qun salyǵynan bosatylatynyn jazǵan edik.