Depýtat býkmekerlik keńse jarnamasynyń kóbeıip bara jatqanyn aıtyp, dabyl qaqty

ASTANA. QazAqparat - Senator Amangeldi Tolamısov elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda býkmekerlik keńseler jarnamasynyń kóbeıip ketkeni týraly aıtty, dep habarlaıdy QazAqparat tilshisi.

Depýtat bul másele Parlamentte birneshe ret kóterilgenine nazar aýdardy. «Oıyn bıznesi týraly» zańda elektrondy kazınolar men ınternet-kazıno qyzmetterine tyıym salynǵan, al «Jarnama týraly» zańda mundaı kazınolar men olardyń qyzmetterine jarnama jasaýǵa da ruqsat etilmegen.

Senatordyń aıtýynsha, qazir zańnamaǵa osyndaı jarnama úshin jaýapkershilikti kúsheıtetin normalar engizý mańyzdy.

«Oıyn avtomattary kez kelgen jerge qoıylǵan, stavka qabyldaý pýnkteri erkin jumys isteıdi. Jarnama seriktesteri de kóbine býkmekerlik kompanııalardy jarnamalap, kún kórip otyrǵandyqtan, odan bas tartpasy anyq. Biraq belgili bir deńgeıde toqtaý salmasa, qoǵamdaǵy jaǵdaı ýshyǵyp barady», - dedi Amangeldi Tolamısov.

Senator aıtqan derekter boıynsha qazir elimizde oıyn bıznesi salasynda jumys isteýge lıtsenzııasy bar 50 uıym bar. Onyń ishinde 26 býkmekerlik keńse, 6 kazıno, oıyn avtomaty qoıylǵan 10 zal, bás tigý pýnktteri (2500-ge jýyq) jáne 8 totalızator jumys isteıdi.

Foto: twitter.com/@Doneck_news_com