Depýtat: Bir palataly Parlament zań sapasyna oń áser etedi

ASTANA. KAZINFORM – Bir palataly Parlamentke kóshý depýtattardyń jaýapkershiligin arttyrady. Óıtkeni, qaıta qarastyratyn burynǵydaı eki palata bolmaıdy jáne zań shyǵarý barysynda kimniń qalaı daýys bergeni kórinip turady. Bul jóninde Májilis depýtaty Nurtaı Sabılıanov «Referendým-2026» onlaın marafony barysynda málimdedi. 

– Bolashaq Quryltaı – Qazaqstandaǵy zań shyǵarý bıligin júzege asyratyn eń joǵarǵy memlekettik organ. Quryltaıda zań jobasy talqylanady, úsh oqylymda qabyldanýy múmkin. Zań sapasyna eshqandaı keri áserin tıgizbeıdi. Kerisinshe, zańnyń bir jerden qabyldanýy ýaqytyn jyldamdatady jáne depýtattardyń jaýapkershiligin arttyrady. Zańnyń sapasyn da jaqsartady, - dedi ol.

Sondaı-aq ol Quryltaıda 145 depýtattyń bolýy Qazaqstanǵa naǵyz saı keletin norma ekenin aıtty.

– Elimizde 17 oblys, 4 qala bar. Álemde aýmaq boıynsha Qazaqstan toǵyzynshy orynda, jeri úlken. Al depýtattar ár qalaǵa, ár aýdanǵa, shekaradaǵy shalǵaı aýyldarǵa baryp, halyqpen jumys isteýi kerek. Sol sebepti, depýtattardyń sany 145 dep belgilenip otyr. Basty maqsat – shyǵarylatyn zańdardyń sapaly bolýy jáne halyqtyń máselelerin sheshý, - dedi N. Sabılıanov.

Sonymen birge ol Quryltaı depýtattarynyń proportsıonaldyq júıe arqyly saılanatynyn jetkizdi.

– Saıası partııalar óz kandıdattaryn tizimge engizip, saılaýǵa qatysady. Halyq qaı partııaǵa daýys berse, sol partııanyń kandıdattary depýtat bolady. Bul saıası partııalardyń rólin kúsheıtedi, halyq aldyndaǵy jaýapkershiligin arttyrady. Sol arqyly saıası partııalardyń básekesi qalyptasady. Bul – buryn tájirıbede bolǵan júıe. Sondyqtan nátıjeli jumys isteıtini anyq, - dep túıindedi depýtat.

Aıta keteıik, buǵan deıin mádenı muranyń mádenı-gýmanıtarlyq qaýipsizdikke septigi jóninde jazǵan edik.