Depýtat: Bir notarıýs 2 kúnde 33 myń atqarýshylyq jazba rásimdegen
ASTANA. KAZINFORM — Májilis depýtattary Bolatbek Nájmetdınuly men Baqytjan Bazarbek prokýrorlyq tekserý qorytyndysyna súıenip, notarıýstardyń atqarýshylyq jazbalardy zańsyz rásimdeý statıstıkasyn atady.
— 1000 notarıýsy bar Almatyda 15 qana notarıýs tek úsh qarjy uıymynyń paıdasyna 20 mlrd 300 mln teńgeniń 133 myńnan astam atqarýshylyq jazba jasaǵan.
Taǵy bir notarıýs 600 mln teńgeni kollektordyń shotyn aýdaryp jibergen. 7,7 mlrd teńgeden astam somaǵa 39 myńnan astam zańsyz atqarýshylyq jazba jasalǵan. Tipti bir notarıýstyń mıkroqarjy uıymymen birge 2 kúnniń ishinde 33 myń atqarýshylyq jazba jasaǵany anyqtalǵan. 2 kúnniń ishinde 33 myń adamnyń qujatyn bir notarıýs qana qalaı teksergen? Ár mınýt saıyn 11 qujat, bes sekýnd saıyn bir jazba rásimdegen degen sóz. Álde notarıýs degen atqarýshylyq jazbalardy rásimdeıtin konveıerge aınalyp ketken be, álde baspahana ma bul? Al ol jazbalardyń áserinen adamdardyń shottary buǵattalady, múlikterine shekteý qoıylady. Sondyqtan atqarýshylyq jazbalardy avtomatty túrde úlestiretin «baraban» tetigin engizý kerek dep esepteımin, — dedi depýtat.
Al Baqytjan Bazarbek notarıýstar qoldan jasalǵan atqarýshylyq jazba úshin mıkroqarjy uıymdary men kollektorlardan orta eseppen 5 myń teńgege deıin aqy alatynyn aıtty.
— Notarıýstar dál ózderiniń qyzmetin paıdalanyp, basqa notarıýstarǵa barmaǵany úshin tabysynyń jartysyn qarjy uıymdary men korrektorlarǵa aýdaryp otyrǵan. Notarıýs qyzmetteriniń, úshinshi tulǵalardyń shottaryna aýdarym jasaý arqyly, qolma-qol aqshalaı berý arqyly «syıaqy» tólep otyrǵan. 3 jyldyń ishinde osyndaı notarıýstar mıkroqarjy uıymdary men kollektorlarǵa 400 mln teńge aýdarǵan, — dedi ol.
Aıta keteıik, búgin Májilistiń jalpy otyrysynda notarıýstardy lıtsenzııadan aıyrý tetikterin keńeıtetin zań jobasy maquldandy.
