Depýtat Bolashaq qarajatyn qaıtarý erejelerin ózgertýdi usyndy
ASTANA. KAZINFORM — Májilis depýtaty Magerram Magerramov «Bolashaq» baǵdarlamasy boıynsha granttan aıyrylǵan stıpendıattardyń qarajatty qaıtarýyn ındeksteýdi usynyp otyr.
Depýtat «Bolashaq» baǵdarlamasy Qazaqstanda 1993 jyly qurylǵanyn eske saldy jáne ony júzege asyrý jyldary myńdaǵan qazaqstandyq memlekettik qarajat esebinen álemniń jetekshi ýnıversıtetterinde bilim alý múmkindigin alǵanyn atap ótti.
— Túrli baǵalaýlar boıynsha, bir stıpendıattyń oqýyna memleket jumsaıtyn jalpy shyǵyn magıstratýra baǵdarlamalary boıynsha 60 myńnan 150 myń AQSh dollaryna deıin, al doktorantýra baǵdarlamalarynda — 200-250 myń dollarǵa deıin jetýi múmkin, — dedi Magerram Magerramov.
Sonymen birge, qazirgi qoldanystaǵy tetik boıynsha stıpendııadan aıyrylǵan nemese mindettemelerin oryndamaǵan jaǵdaıda qarajatty qaıtarý ınflıatsııa men aqshanyń ýaqyttyq qunyn eskermeı, memleket naqty jumsaǵan shyǵyndardy ǵana óteýdi qarastyrady.
— Ekonomıkalyq esepteýlerge sáıkes, shetel valıýtasyndaǵy ınflıatsııa jylyna shamamen 3% bolǵannyń ózinde, 5-10 jyl ishinde qarajattyń naqty quny shamamen 15-30%-ǵa tómendeıdi. Mysaly, eger memleket bir stıpendıattyń oqýyna 100 myń dollar jumsasa, onda 10 jyldan keıin ınflıatsııany eskergendegi osy qarajattyń balamaly quny shamamen 134 myń dollar. Al ındeksatsııasyz tek nomınaldy somany qaıtarý kezinde memlekettik bıýdjet bir jaǵdaıdyń ózinde shamamen 34 myń dollar joǵaltady, — dep málimdedi depýtat.
Oǵan qosa, depýtat shyǵyndar 150-200 myń dollarǵa deıin artqan jaǵdaıda, memlekettik bıýdjet úshin yqtımal shyǵyndar bir adamǵa shaqqanda 50-70 myń dollar bolýy múmkin ekenin atap ótti.
Osyǵan baılanysty májilismen qarajatty qaıtarýdy ındeksteý tetigin engizýdi usyndy. Bul bıýdjet qarajatynyń naqty qunyn saqtap, stıpendıattardyń qarjylyq jaýapkershiligin arttyrýǵa, respýblıkalyq bıýdjet qarajatyn anaǵurlym tıimdi paıdalanýǵa múmkindik beredi.
Aıta keteıik, Parlament palatalarynyń birlesken otyrysy 20 naýryzda ótedi.
