Depýtat Bıshimbaevqa qatań jaza qoldanýdy talap etti

Májilis depýtaty Juldyz Súleımenova Úkimet basshysynyń atyna joldaǵan depýtattyq saýalynda óz áıelin óltirdi degen kúdikke ilingen eks-sheneýnik Qýandyq Bıshimbaevqa qatań jaza qoldanýdy talap etti, dep habarlaıdy Kazinform.

«Jemqorlyq úshin sottalyp, artynan raqymshylyqqa ıe bolǵan eks-sheneýnik óz áıelin óltirdi degen kúdik pen jantúrshigerlik ashyq aqparattan qoǵam dúrbeleńge tústi. Otbasylyq zorlyq-zombylyq, qatygezdik, patrıarhaldyq ozbyrlyqqa shydamaǵan áıelderdiń jan daýsyn estıtin jáne qatań shara qabyldaıtyn ýaqyt jetti», - dedi ol.

Depýtat áıel men balaǵa zorlyq-zombylyq kórsetkenderge aıaýshylyq tanytýǵa bolmaıtynyn eske saldy. 

«Eshkimniń áıel adamdardy qorlap, óltirýge haqysy joq. Qylmyskerge qatań jaza berilýin talap etemiz», - dedi Májilis depýtaty.

Sondaı-aq ol zańnamadaǵy turmystyq zorlyq-zombylyqtyń aldyn alatyn, qatań sharalar qabyldaıtyn jaýapty memlekettik organdy bekitetin ýaqyt jetkenin aıtty.

«Úkimetten áıelder qaýipsizdigin qamtamasyz etýde, ajyrasqan áıelderge alımentti ýaqtyly tóleýge baǵyttalǵan naqty mehanızmderdi aıqyndaıtyn memlekettik saıasatty bekitýdi suraımyz. Otbasylyq zorlyq-zombylyqty aldyn alý men krımınaldandyrý máselelerin qarastyra otyryp ázirlengen, áıelderdiń quqyǵy men balalardyń qaýipsizdigine arnalǵan zań tujyrymdamasyn Májiliske tez arada engizýdi suraımyz», - dedi Juldyz Súleımenova.

Depýtat keltirgen derekke súıensek, 2021 jyly úıdegi zorlyq-zombylyqtyń tek 40 paıyzy sotqa jetken.