Depýtat: Balalaryn tastap ketken mıgranttardy ata-ana quqyǵynan aıyrý kerek
ASTANA. QazAqparat - Baýyr eti balalaryn tastap, shetelge jumys izdep ketken adamdardy ata-ana quqyǵynan aıyrý kerek. Bul málimdemeni Qyrǵyzstan Joǵarǵy Keńesiniń depýtaty Yrǵal Qadyralıeva jasady, dep habarlaıdy KırTAG.
«Meniń oıymsha, óz balalaryn tastap, shetelge jumys isteýge ketken mıgranttardy ata-ana quqyǵynan aıyrý kerek dep esepteımin», - dedi ol.
Onyń aıtýynsha, búgingi kúni eldegi balalar úıi men ınternattar shetelge ketken jumyskerlerdiń balalarymen tolyp qalǵan.
«Qazir balalar úılerinde tárbıelenip jatqan balalardyń ata-analary bar. Olar óz perzentterin «ýaqytsha» dep tastap ketken. Jalpy, el boıynsha balalar úıinde 11 myń bala tárbıelenip jatyr. Al shyn mánisinde, olardyń 3 myńy ǵana tul jetimder», - deıdi depýtat.
Depýtattyń atap ótýinshe, memleket ata-anasy tiri turǵanyna qaramastan, ol balalardy asyrap baǵýǵa qomaqty qarjy bólip otyr.
«Balalaryn «ýaqytsha» tastap ketken ata-analardyń biri memleketke kómektesip otyrǵan joq. Sondyqtan, olardy ata-ana quqyǵynan aıyrý kerek. Sonda basqa bala asyrap alǵysy keletinderge múmkindik beremiz. Bolmasa balalaryn tastap ketkender sol perzentterin asyraýǵa qajetti qarjyny memleket qazynasyna tólesin», - degen Y.Qadyralıeva.
