Depýtat balalardyń kópqabatty úı terezesinen qulaýy máselesin kóterdi
NUR-SULTAN. QazAqparat – Májilis depýtaty Syrym Ertaev balalardyń kópqabatty úı terezesinen qulaý jaǵdaılary jóninde QR Premer-Mınıstriniń orynbasary Roman Sklıarǵa saýal joldady, dep habarlaıdy QazAqparat.
Depýtat QR Ulttyq statıstıka bıýrosynyń málimetin keltirip, sońǵy bes jylda Qazaqstanda 140-tan astam bala kópqabatty úıdiń terezesinen qulap mert bolǵanyn aıtty. Tek osy jyldyń 1-shi toqsanynda ǵana 9 jaǵdaı tirkelgen, onyń 1-i qazamen aıaqtalǵan.
«Ótken jyly Nur-Sultan qalasynda 2016 jyly týǵan bala úlkenderdiń qaraýynsyz qalyp, besinshi qabattaǵy páter terezesinen qulap, sol jerde qaıtys boldy. Ekinshi jaǵdaı Tarazda, 7-shaǵynaýdanda bolǵan. Qaraýsyz qalǵan 2018 jyly týǵan bala bes qabatty turǵyn úıdiń tórtinshi qabatynyń terezesinen qulap, aýyr jaraqat alǵan», - dedi S. Ertaev Májilistiń jalpy otyrysynda.
Onyń aıtýynsha, kóptegen elderdiń zańnamasynda balalar ornalastyrylatyn ǵımarattyń terezelerine shektegishter qoıý mindeti bekitilgen. Olarǵa aýrýhana, mektep jáne balabaqshalar jatady. Basqa elderde terezeler óndirisinde mindetti túrde shektegishterdi ornatý qarastyrylǵan.
«Bizde, Qurylys jáne turǵyn úı-kommýnaldyq sharýashylyq isteri komıteti tóraǵasynyń buıryǵymen turǵyn úı terezelerinen balalardyń qulap ketpeýi úshin qaýipsizdik qulyptaryn ornatý boıynsha mindetti talaptar engizilgen. Biraq, bul ereje 2018 jyldan bastap paıdalanýǵa berilgen jańa ǵımarattarǵa ǵana qatysty. Bul rette, buryn salynǵan ǵımarattarǵa osy standarttyń talaptary esh sáıkes kelmeıdi. Tipten qazir berilip jatqan jańa úılerde de bul talaptar oryndalmaýda. Sondyqtan balalardyń qaýipsizdigin qamtamasyz etý úshin tıisti sharalardy qabyldaýyńyzdy suraımyn», - dedi Syrym Ertaev.
