Depýtat balabaqshalarda úzdiksiz aýdıojazba júrgizýdi usyndy
ASTANA. KAZINFORM — Búgin Quryltaı otyrysynda deptýtat Táttigúl Talaeva Oqý-aǵartý jáne Іshki ister mınıstrlerine depýtattyq saýal joldap, mektepke deıingi uıymdardaǵy balalardyń qaýipsizdigi jáne beınebaqylaý júıesi máselesin kóterdi.
— Balanyń balabaqshadaǵy qaýipsizdigi kezdeısoq saqtalyp qalǵan beınejazbaǵa nemese balanyń bolǵan oqıǵany eresekterge aıtyp jetkize alýyna baılanysty bolmaýy tıis, — dedi ol.
Sonymen qatar, bıyl qazan aıynda Astana qalasynda túzetý baǵytyndaǵy balabaqshanyń eki tárbıelenýshisine qatygezdik kórsetilgenin eske saldy. Depýtattyń sózinshe, buǵan deıin osyndaı jaǵdaılar Aqtóbe, Shymkent, Temirtaý jáne Pavlodar qalalarynda da qoǵamnyń nazaryn aýdarǵan bolatyn.
— Bıylǵy qazan aıynda Jambyl oblysynyń Qordaı aýdanynda da alańdatarlyq oqıǵa oryn aldy. Kóptegen jaǵdaıda bolǵan jaıtty anyqtaýǵa dál osy beınebaqylaý kameralarynyń jazbalary kómektesti. Munyń ózi ata-anasynyń janynda bolmaǵan kezde balalardyń qaýipsizdigi qanshalyqty senimdi qorǵalǵan degen mańyzdy suraqty týyndatady. Ásirese erekshe bilim berý qajettilikteri bar balalardyń jaǵdaıy erekshe alańdaýshylyq týǵyzady. Árbir bala ózine ne bolǵanyn túsindirip aıta almaıdy nemese kómek suraı almaıdy. Sondyqtan balalardy qorǵaýdyń naqty ári tıimdi júıesi qajet. Quryltaıda «Qazaqstan balalary» depýtattyq tobynyń jumysy bastalǵany jarııalandy, — dedi ol.
Táttigúl Talaevanyń paıymynsha, balalar quqyǵyn qorǵaý «Zań men tártip» qaǵıdatymen tyǵyz baılanysty. Óıtkeni zań eń aldymen ózin-ózi qorǵaı almaıtyn jandardy qorǵaýy tıis.
— 2019 jylǵy 23 qańtardaǵy Іshki ister mınıstrligi men Bilim jáne ǵylym mınıstrliginiń № 49 jáne № 32 birlesken buıryǵymen bekitilgen Beınebaqylaý standarttary, eń aldymen, obektilerdiń qaýipsizdigin qamtamasyz etýge baǵyttalǵan. Alaıda toptyq bólmeler, oıyn bólmeleri men túzetý jumystaryna arnalǵan kabınetter beınebaqylaý ornatylýy mindetti úı-jaılardyń naqty tizbesine tikeleı engizilmegen. Beınejazbalar keminde 30 táýlik saqtalady. Sonymen qatar qoldanystaǵy Standarttarda jekemenshik mektepke deıingi uıymdarǵa qatysty osyndaı biryńǵaı talaptar belgilenbegen, — dep synǵa aldy depýtat.
Ol Oqý-aǵartý mınıstrligi men Іshki ister mınıstrligine máseleni sheshýdiń joldaryn da usyndy:
- Birinshi, beınebaqylaýdyń negizgi maqsaty retinde balalardyń quqyǵy men qaýipsizdigin qorǵaýdy bekitý. Balalardyń jeke ómirine qol suǵylmaý quqyǵyn eskere otyryp, memlekettik jáne jekemenshik balabaqshalarda beınebaqylaý ornatylýy mindetti úı-jaılardyń tolyq ári naqty tizbesin belgileý. Kameralardy ózge úı-jaılarǵa ornatýdy uıym basshysynyń óz qalaýyna qaldyratyn 7-tarmaqtyń 4) tarmaqshasyn alyp tastaý;
- Ekinshi, beınejazba júrgizýge jol berilmeıtin úı-jaılarda, aldyn ala quqyqtyq baǵalaý júrgizý, balalardyń jeke ómirine qol suǵylmaý quqyǵyn saqtaý, jazbalardy qorǵaý jáne olarǵa qol jetkizýdi qatań shekteý sharttaryn eskere otyryp, táýlik boıy, aptasyna 7 kún úzdiksiz aýdıofıksatsııa júrgizýdi mindetti túrde qarastyrý;
- Úshinshi, beınejazbalardy saqtaýdyń eń tómengi merzimin 30 táýlikten 90 táýlikke deıin uzartý. Ata-analardyń ótinishteri boıynsha beınejazbalardy usyný tártibin, olardy qaraý merzimderin, ózge balalardyń derbes derekterin qorǵaý tetikterin jáne beınejazbalar arhıviniń saqtalýyna uıym basshylarynyń jaýapkershiligin belgileý.
— Ata-analar balasyn balabaqshaǵa tapsyra otyryp, ony qaýipsiz ortaǵa qaldyratynyna tolyq senimdi bolýy tıis, — dep túıindedi depýtat.
Aıta keteıik, buǵan deıin balany balabaqshaǵa ne mektepke beretin ýaqyt kelgende ata-analarǵa push-habarlama jiberiletinin jazǵanbyz.