Depýtat ajyrasqandardyń tabys salyǵyn arttyrýdy usyndy
ASTANA. KAZINFORM — Májilis depýtaty Ardaq Nazarov Premer-mınıstr Oljas Bektenovke joldaǵan saýalynda ajyrasqan qazaqstandyqtarǵa tabys salyǵyn joǵary mólshermen salýdy usyndy.
— Ulttyq statıstıka bıýrosynyń resmı derekterine súıensek, 2023 jyly elimizde 120,8 myń neke tirkelse, sonyń 40,2 myńy ajyrasýmen aıaqtalǵan. Saldarynan búginde 400 myń áıel men 60 myń erkek jalǵyz basty adam kebin qushyp otyr, — dep bastaǵan depýtat zań talaptaryn qatańdatýdy usyndy.
Resmı túrde ajyrasqan tulǵalarǵa salanatyn salyq óse bermek.
— Ajyrasýǵa ótinish bildirgen erli-zaıyptylardyń birjaqty sheshimi negizinde sotqa aryz qabyldanbas buryn arnaıy memlekettik baj nemese jarna tóleý tártibin engizý qajet. Bul tólemniń kólemi edáýir joǵary bolýy tıis. Sonymen qatar, resmı túrde ajyrasqan tulǵalar úshin tabys salyǵynyń mólsherlemesin kezeń-kezeńimen arttyrý qarastyrylsyn, — dedi ol.
Sondaı-aq, otbasy máselesinde áýlettiń úlkenderin tyńdaý, daý-damaıdy bitimmen sheshý tájirıbesin zamanaýı formatta qoldaný úshin ardagerler alqasy, ımamdar, áıelder keńesi syndy konsýltatıvtik-keńesshi organdardyń áleýetin paıdalaný usyndy.
— Ajyrasýǵa ótinish bergen erli-zaıyptylardyń isi sotqa jetpeı turyp, aldyn ala osy keńesterdiń qaraýyna usynylyp, bitimgershilik jáne tatýlasý baǵytynda jumys júrgizilse, kóptegen otbasylardyń saqtalyp qalýyna múmkindik týar edi, — deıdi Ardaq Nazarov.
Májilis depýtaty «Jas otbasy» ulttyq baǵdarlamasyn ázirleý týaly da usynys aıtty.
— Úılený toılaryn ótkizý úshin ǵana nesıe rásimdeýge jol bermeý jóninde keń kólemdi aqparattyq-ıdeologııalyq naýqan júrgizý kerek. Qazirgi qoǵamda eki jastyń úılený toıyna baılanysty qaryzǵa batý, bankten nesıe alý jıilep ketti. Bir sáttik saltanat úshin birneshe jyl nesıe tóleý jas otbasynyń berekesin ketirip, ekonomıkalyq táýelsizdigine keri áser etedi. Osyǵan baılanysty, Úkimetke jastar arasynda qarjylyq saýattylyqty arttyrý, nesıege toı jasamaý jóninde jalpyhalyqtyq aqparattyq-ıdeologııalyq qozǵalys bastaýdy usynamyn, — dedi ol.
Sondaı-aq, búgin Májilis Salyq kodeksin qabyldady.