Depýtat Aıdos Sarym: Memleket basshysy — jańa Ata Zańnyń bastamashysy ǵana emes, negizgi avtory

ASTANA. KAZINFORM — Bul týraly Májilis depýtaty Aıdos Sarym «Konstıtýtsııalyq reforma jáne qoǵamdyq dıalog: bolashaqty qalyptastyrý» atty saraptamalyq alańda sóılegen sózinde málimdedi. Ol Memleket basshysynyń jańa Konstıtýtsııa jobasyn ázirleýge alǵashqy kúnderden bastap belsendi qatysqanyn atap ótti.

— Memleket basshysy Parlamenttik reforma jónindegi Jumys tobynyń qyzmetin alǵashqy kúnderden bastap óte muqııat baqylap otyrǵany barshaǵa aıan. Ol Jumys tobynyń jetekshisin qabyldap, top múshelerimen kezdesip otyrdy, óz ıdeıalaryn aıtyp, baǵyt-baǵdar berdi, — dedi Aıdos Sarym.

Májilis depýtatynyń aıtýynsha, jańa Ata Zańdy qabyldaý qajettigi el azamattarynan túsken usynystardyń orasan zor kólemin taldaý nátıjesinde aıqyn boldy.

— Halyqtan myńdaǵan usynys túsip, protsess keń aýqymǵa ıe bolǵan kezde, Prezıdent Jumys tobynyń múshelerin týra Quryltaı qarsańynda jınap, alda bolatyn aýqymdy ózgerister týraly málimdedi. Ol Konstıtýtsııalyq sot pen basqa da memlekettik organdardyń atyna túsken usynystardyń formaty, mazmuny men kólemi jańa Konstıtýtsııany qabyldaý qajettigin aıqyn kórsetetinin aıtty, — dedi depýtat.

Sondaı-aq, Aıdos Sarym Prezıdenttiń qujatty ázirleý barysynda sarapshylar qaýymdastyǵymen belsendi ári tyǵyz jumys istegenine erekshe nazar aýdardy.

— Buǵan ózderińiz de kýá boldyńyzdar. Konstıtýtsııalyq komıssııanyń jumysy barysynda Memleket basshysy onyń jetekshisimen birneshe ret kezdesti. Ol Konstıtýtsııalyq sottyń tóraǵasyn jáne basqa da uıymdardyń basshylaryn qabyldady. Bul Prezıdenttiń jumysqa tikeleı ózi aralasyp otyrǵanyn kórsetedi, — dedi ol.

Sóz sońynda Aıdos Sarym Memleket basshysynyń jańa Konstıtýtsııany ázirleýdegi aıryqsha róline toqtalyp, ony konstıtýtsııalyq reformanyń basty arhıtektory dep atady.

— Sondyqtan Prezıdentimizdi jańa Ata Zańnyń negizgi avtorlarynyń biri ári arhıtektory dep aıtýǵa bolady. Bul myzǵymas aqıqat, — dep túıindedi sózin Aıdos Sarym.