Depýtat aýyldaǵy mamandardyń jetispeýshiligi máselesin kóterdi

NUR-SULTAN. QazAqparat - Senator Lázzat Súleımen joǵary oqý oryndarynyń jas túlekterine arnalǵan «Dıplommen aýylǵa» baǵdarlamasynyń tartymdylyǵyn arttyrý úshin ony ózgertýdi usyndy, dep habarlaıdy QazAqparat tilshisi.

Ol elimizdiń Premer-Mınıstriniń atyna joldaǵan depýtattyq saýalynda birqatar naqty sharalardy da atap kórsetti. Bul jobanyń tıimdiligine toqtalǵan senator, baǵdarlamaǵa qatysýshylardyń keıinnen aýylda turyp jatqanyn aıta kele, kadr tapshylyǵy máselesi áli de ózekti bolyp otyrǵanyn alǵa tartty.

«Ornalasqan mamandar bilim salasyna, densaýlyq saqtaý salasyna tıesili. Problemalar da barshylyq. Birinshiden, mádenıet, sport, áleýmettik, agroónerkásip salalaryna ornalasqan mamandar sany óte az», - dedi senator palatanyń jalpy otyrysynda.

Sondaı-aq, depýtat Ulttyq ekonomıka mınıstrligi júrgizip jatqan tájirıbeni de nazardan tys qaldyrmady. Atap aıtqanda, baǵdarlamaǵa bólinetin qarjy kólemin qysqarǵanyna toqtaldy. Bul kóbinese jobaǵa qatysýshylardyń tıisti tólemdersiz qalýyna ákeledi. Máselen, ótken jyly Batys Qazaqstan oblysynda ótinish bergenderdiń 70 paıyzy ǵana turǵyn úı satyp alýǵa nesıe ala alǵan bolsa, qarjy tapshylyǵy 757 mıllıon teńgeden asqan. Osy jáne basqa da birqatar júıeli máselelerdi sheshý úshin senator Úkimettiń qaraýyna birqatar naqty sharalardy usyndy.

«Mamandardy yntalandyrý men jergilikti jerlerde bekitýdi aýylda ǵana emes, monoqalalarda da iske asyrý kerek. Sondaı-aq búgingi ekonomıkalyq jaǵdaıdy eskerip, jergilikti atqarýshy organdardyń usynystaryna sáıkes, kóterme járdemaqy jáne turǵyn úıge beriletin bıýdjettik nesıe mólsherlerin ulǵaıtýdy qarastyrý qajet. Óńirlerdiń qajettiligin naqty eskerip, tıisti taldaý ótkizý, qoldaý salalarynyń tizimin keńeıtý, qarajat bólýdiń, paıdalanýdyń ashyqtyǵyn qamtamasyz etý, kómek berý baǵyttaryn keńeıtý mańyzdy», - dedi senator.