Depýtat aýyz sýsyz aýyldar máselesin «Qazaqstan halqyna» qory arqyly sheshýdi usyndy

ASTANA. KAZINFORM — Májilis depýtaty Naýryz Saılaýbaı Úkimetke saýal joldap, aýyldardy aýyzsýmen qamtamasyz etý kórsetkishteri týraly resmı derekterdiń shyndyqpen sáıkespeıtinin synady. 

— Resmı derekterge súıensek, Qazaqstanda qalalar aýyz sýmen 99,3 paıyzǵa, aýyldar 97,5 paıyzǵa qamtamasyz etilgen. Biraq keıbir derekkózderde elimizdegi 18 qala men 469 aýylda taza sý múlde joq kórinedi. Bolsa da talapqa saı emes. Eń bir qyzyǵy, resmı derekterde aýyzsýsyz aýyldar men qalalar degen tizim esh jerde kórsetilmeıdi. Bul shyndyqty jasyrý ma, álde kóz aldaý ma, — dep surady depýtat.

Onyń aıtýynsha, aýyzsý máselesi ásirese joly qıyn shalǵaı aýyldarda ózekti.

— Ondaı aýyldarda ınfraqurylym qurylysy úlken shyǵyndardy qajet etetini belgili. Bıýdjetke salmaq bolatyn mundaı eldi mekenderdi qaıta saralap, ondaǵy turǵyndardyń turmysyn ońaltý úshin qarjylandyrýdy turaqty qamtamasyz etetin memlekettik-jekeshelik áriptestik nysandaryn tartyp nemese «Qazaqstan halqyna» qorynan qarajat baǵyttalsa. Tipti, halyqaralyq granttardy da múmkindiginshe beıimdeı otyryp, aýyldarda ómir súrýdiń joǵary deńgeıin qalyptastyryp, aýyz sýdyń maqsatty qoryn qurý sózsiz básekelestiktiń biregeı úlgisi bolar edi, — dedi ol.

Buǵan deıin qazaqstandyqtar aýyzsýdyń tólemin jańa ádispen tóleı bastaıtynyn jazǵan edik.