Depýtat aýyl sharýashylyǵy tehnıkalarynyń baǵasyn tómendetý máselesin kóterdi
ASTANA. KAZINFORM — Prezıdent Joldaýynan keıin Quryltaı depýtaty Serik Egizbaev aýyl sharýashylyǵy salasynda aıtylǵan túıtkilderge qatysty oı-pikirin bólisti.
Eske salaıyq, búgin Memleket basshysy Joldaýynda otandyq traktorlar men kombaındardyń sanyn kóbeıtý qajettigin málimdegen edi.
Quryltaı depýtaty Serik Egizbaev bizge bergen suhbatynda bul máseleniń ózektiligine toqtaldy.
— Prezıdent bul túıtkildi aldyńǵy joldaýlarynda da aıtty. Birneshe jyl buryn aýyl sharýashylyǵy tehnıkasyn jańartý kólemi jylyna 5-6%-dan aspaıtyn. Zamanaýı tehnıka bolmasa, qazir aýyl sharýashylyǵynda kóp ónim ala almaısyz. Sondyqtan Prezıdent eki jyl buryn jyl saıyn tehnıkalardyń 10%-yn jańartyp otyrýdy tapsyrǵan. Biraq munyń da birneshe joly bar. Tehnıkany shetelderden ákelýge nemese ózimizde óndirýge bolady. Óndiristik saıasattan mysal keltirsek, Qostanaıdaǵy «AgromashHoldıng KZ» AQ-ny atar edik, — dedi ol.
Depýtattyń sózinshe, bul kásiporyn zamanaýı tehnologııalar negizinde túrli tehnıkalardy, sonyń ishinde negizinen traktorlar men kombaındar shyǵarady.
— Ekinshi másele — atalǵan ónimderdiń baǵasy qoljetimdi bolýy kerek. Qymbat baǵaǵa baılanysty bizge fermerlerden shaǵym kóp túsedi. Prezıdenttiń Úkimet osyǵan nazar aýdarsyn degen tapsyrmasy bolsa kerek, — dedi Serik Egizbaev.
Aıta keteıik, buǵan deıin Prezıdent aýyl sharýashylyǵy ınfraqurylymyn damytý isine de basa mán berý kerek ekenin málimdedi.
