Depýtat áýe bıletteri baǵasynyń qymbat bolýy sebebin atady

ASTANA. KAZINFORM — Senator Súıindik Aldashev óziniń depýtattyq saýalynda Qazaqstannyń azamattyq avıatsııasyndaǵy problemalar týraly jarııa etti. 

Depýtattyń aıtýynsha, sáýir aıynyń basynda Senattyń Ekonomıkalyq saıasat, ınnovatsııalyq damý jáne kásipkerlik komıtetiniń músheleri dóńgelek ústel otyrysyn ótkizip, saladaǵy negizgi máselelerdi talqylady. Birinshiden, bul avıatsııalyq otynnyń jetispeýshiligi. Otandyq munaı óńdeý zaýyttary ósip kele jatqan suranysty jaba almaıdy jáne aıyrmashylyqty ımporttan alýǵa týra keledi. Qazirdiń ózinde otyn tapshylyǵy shamamen 237 myń tonna. 2030 jylǵa qaraı bul tapshylyq 550 myń tonnaǵa jetýi múmkin.

Qazaqstandyqtardy áýe bıletteriniń baǵasy da alańdatyp otyr. Depýtat atap ótkendeı, bılet qunynyń qurylymynda 36,5 paıyzy avıatsııalyq otynǵa jumsalatyn shyǵyndy quraıdy. Tehnıkalyq qyzmet kórsetý — 14,9%, áýejaıǵa qyzmet kórsetý — 10,7% jáne jolaýshylarǵa qyzmet kórsetý — 6,1%. Sonymen qatar, janarmaı naryǵyna eshkim kire almaıdy, ashyq emes.

— Avıaotyndy satýdan túsken kiris áýejaılardaǵy kiristiń negizgi bóligin quraıdy. Basqa oıynshylardyń osy ınfraqurylymǵa qol jetkizýine múddeli emes áýejaılar bar, bul avıakompanııalar úshin otynnyń joǵary qunynyń sebebi sanalady jáne nátıjesinde áýe bıletteriniń qunyna áser etedi. Ókinishke qaraı, búginde avıaotyndy satýdyń jáne onyń baǵasyn belgileýdiń ashyq tetigi joq, sondaı-aq memlekettik organdardyń bul máseleni retteýge biryńǵaı kózqarasy joq, — dedi Súıindik Aldashev Úkimet basshysynyń atyna joldaǵan saýalynda.

Senator áýejaılardy damytýǵa júıeli kózqarastyń joqtyǵyna da toqtaldy. Olardyń kópshiligi jergilikti bıýdjetterden qarjylandyrylady jáne shyǵynǵa ushyraıdy. Infraqurylym tozǵan, jabdyq eskirgen ári áýejaılardyń jartysy shuǵyl jóndeýdi qajet etedi.

— Otandyq azamattyq avıatsııany basqarýdyń tıimdi ońtaıly úlgisin ázirleýdi usynamyz. Otandyq munaı óńdeý zaýyttarynda óndiristi ulǵaıtý máselesin sheshý kerek. Avıakompanııany avıaotynmen qamtamasyz etý jóninde biryńǵaı júıeli tásilder ázirlenýi tıis. Áýejaılar beıindi emes qyzmet túrlerin qospaǵanda, negizgi qyzmet túrine nazar aýdarýy kerek. Osy salanyń ınvestıtsııalyq tartymdylyǵyn arttyrý jónindegi jumysty jandandyrý, áýejaılardyń qyzmetine ınvestorlardy tartý jónindegi ońtaıly tetikterdi ázirleý qajet, — dedi depýtat.

Eske salsaq, jaqynda Premer-mınıstr Oljas Bektenov Memleket basshysynyń avıaotyn naryǵyn damytýǵa qatysty tapsyrmalaryn júzege asyrý máseleleri jóninde jıyn ótkizdi. 

Sonymen qatar, Qazaqstanda ekologııalyq avıaotyn óndiretin zaýyt salynatyny málim boldy.