Depýtat astanalyq qos teatrǵa respýblıkalyq mártebe berý týraly másele kóterdi
ASTANA. Qańtardyń 28-i. QazAqparat - Májilistiń jalpy otyrysynda depýtat Aldan Smaıyl QR Premer-Mınıstri Kárim Másimovtyń atyna depýtattyq saýal joldap, astanalyq qos teatrǵa respýblıkalyq mártebe berý jóninde másele kóterdi,
dep habarlaıdy QazAqparat.
«Astana qalasy respýblıkanyń elordasy retinde barlyq jaǵynan damyp keledi. Búginde qalanyń arhıtektýralyq sáýletine mádenıeti saı dep anyq aıta alamyz. Shaharda astanalyqtardyń ǵana emes, respýblıkanyń kóz qýanyshy men maqtanyshyna aınalǵan óner ordalary az emes. Solardyń biri jáne biregeıi - Qalıbek Qýanyshbaev atyndaǵy qazaq drama teatry men Maksım Gorkıı atyndaǵy orys drama teatry. Atalǵan óner shańyraqtarynyń tarıhy qala men óńirdiń keshegi jáne búgingi shejiresimen astasyp jatyr. Orys drama teatrynyń qurylǵanyna 80 jyldan assa, qazaq drama teatrynyń alǵashqy qoıylymy ótken ǵasyrdyń 30-shy jyldary sahnaǵa shyǵarylǵan»,- deıdi Májilis depýtaty Aldan Smaıyl.
Eki teatr da uzaq ýaqyt qala men aımaqtyń rýhanı-estetıkalyq suranysyn qanaǵattandyrýmen birge, qazaq ónerin shetelderge tanytýǵa oıdaǵydaı qyzmet etip keledi. Búginde astanalyq teatrlar joǵarǵy talǵamǵa saı sahnalyq sheberligimen jáne repertýarlyq baı mazmunymen erekshelenýde. Álemdik dramatýrgııanyń ozyq úlgileri men qazaq dramasynyń klassıkalyq týyndylaryn sahnalaýda aıtarlyqtaı jetistikke ıe. Olarda 4 halyq ártisi, Qazaqstanǵa eńbegi sińgen 14 qaıratker, halyqaralyq jáne respýblıkalyq mártebeli syılyqtardyń laýreattary qyzmet etedi.
Astana elimizdiń mádenı-rýhanı ordasyna aınalyp, álemdik ónerge umtylǵan, ǵalamǵa tanylǵan shaqta atalǵan teatrlardyń qalalyq deńgeıde qalýy orynsyz dep oılaımyz. Olardyń dárejesi Astananyń bıik mártebesine saı bolýǵa tıis. Búginde osy óner ordalaryna respýblıkalyq mártebe berý qaı jaǵynan alsaq ta ádildik bolyp tabylady. Bul teatrlardyń elge belgili óner sheberlerimen tolyǵýyna, áleýmettik, materıaldyq-tehnıkalyq bazasyn nyǵaıtýǵa yqpal etedi.
