Depýtat Astanadaǵy aqyly turaqtarda 30 mınýt tegin turý tetigin engizýdi usyndy

ASTANA. KAZINFORM — Májilis depýtaty Nartaı Sársenǵalıuly Premer-Mınıstrdiń birinshi orynbasary Roman Sklıarǵa joldaǵan saýalynda Astanadaǵy aqyly turaqtardy qysqartyp, alǵashqy 30 mınýtty tegin etý týraly usynys tastady.

«Basqa túgili bas qalada attap bassań, aqy tóleýge týra keledi. Sebebi alǵashynda adam kóp baratyn ortalyq jáne iskerlik aýdandarda aqyly turaq bolady degen jeleýmen bastalǵan joba tutas qalany tutqynǵa aldy. Qazir Astanada 7216 aqyly avtoturaq bar eken, ony jyl sońyna deıin 10 000-ǵa jetkizý jospary bar eken. Sol aqyly turaqtardan alynatyn aqshada jekemenshik kompanııanyń úlken úlesi bar. Ár saǵaty 100 teńge. Demalys nemese mereke kúnderi tegin degen jeńildikti de alyp tastaǵan. Aqyly avtoturaqtardyń aqysyn tólemeseń, aıyppul salady, somasy — 10 000 teńgeden asady. ıAǵnı, azamattarymyz 100 teńge tólemegen jaǵdaıda, 10 myń teńge tóleýge májbúr. Bul degenimiz 100 ese kóp», — dedi depýtat.

Depýtattyń aıtýynsha, keıingi 4 jylda azamattar Astanadaǵy aqyly avtoturaqtarǵa 725,9 mln teńge tólegen. Sonyń 617,3 mln teńgesi jeke seriktestikke tússe, 108,7 mln teńgesi ǵana qala bıýdjetine aýdarylǵan.

«Al avtoturaqtardy abattandyrý, joldy jóndeý jáne kósheni jınaý shyǵyndaryn qala ákimdigi kóteredi. Jeke kompanııanyń mindeti qandaı sonda? Alǵashynda aqyly turaqtyń arqasynda avtoturaqtaǵy qozǵalys jyldamdyǵy azaıady, turaqtardyń qoljetimdiligi artady, kóshelerde kólikpen toqtaý erejeleri retteledi degen. Olaı bolmady biraq. Aqyly avtoturaqtarǵa kommertsııalyq ortalyqtar, qoǵamdyq oryndar tipti, qurylys normalary men qaǵıdalaryn buza otyryp áleýmettik obektilerge kelýshilerge arnalǵan jerler de berildi. Turǵyndary tıisti kondomınıým rásimdep úlgermegen turǵyn alaptary men tynysh aýdandarda da aqyly turaqtar paıda boldy. Astanadaǵy saıabaqtar men turǵyn úı keshenderiniń aınalasynda aqyly turaqtan aıaq alyp júrý múmkin emes. Halyqtyń qaltasyna osynsha túsý zańdy ma?» — dep surady depýtat.

Onyń sózinshe, aqyly avtoturaqtardy kólikter eń kóp jınalatyn iskerlik aýdandarda ǵana qaldyryp, qalǵanyn qysqartý kerek.

«Turǵyn úıler men saıabaqtardyń aýmaǵynda aqyly turaq bolmaýy qajet. Aqyly kólik turaqtaryn qadaǵalaıtyn memlekettik operatordy qurý kerek. Oǵan deıin memleket pen jeke menshik sektordyń seriktestigi týraly sharttardyń talaptaryn qaıta qarap, jekemenshik kompanııaǵa turaq aýmaǵyn kútip ustaý, jolyn jóndeý qyzmetin júkteý qajet. Aqyly avtoturaqta tegin turý ýaqytyn kemi 30 mınýtqa jetkizý kerek», — dedi Májilis depýtaty.

Eske salsaq, Astana ákimdigi men aqyly turaqtardan aqsha jınaıtyn kompanııa arasyndaǵy kelisimshart 2038 jylǵa deıin bekitilgen.