Depýtat áriptesterin jýrnalısterden qoryqpaýǵa shaqyrdy

ASTANA. QazAqparat – Almaty qalasy máslıhatynyń depýtaty Ásııa Aqanova áriptesterin jýrnalısterden qoryqpaýǵa shaqyrdy, dep habarlaıdy QazAqparat tilshisi.

«Kóptegen máseleniń sheshimi óńirlerdiń, aýdandar men qalalardyń jol kartalarynda belgilengen. Olarda basym baǵyttar boıynsha naqty is-sharalar aıqyndalǵan jáne bári qazaqstandyqtardyń usynystary men ótinishterine negizdelgen. Basqasha aıtqanda, bizde olardy júzege asyrýǵa qajetti quraldar men ókilettikterdiń bári bar. Biraq, olardy tolyq paıdalanýdy osy ýaqytqa deıin úırenbegenimizdi moıyndaýymyz kerek», - dedi depýtat.

Sondaı-aq, ol birneshe usynys aıtty.

«Saılaýaldy baǵdarlamany iske asyrý bastaldy. Nysandar iske qosylyp, bastamalar iske asyrylyp jatyr. «Mınıstr jańa óndiris ashty», «Mınıstr jańa baǵdarlamany iske qosty» dep keletin jańalyqtar jıi kezdesedi. Eger ortalyq deńgeıde bıýdjetti Májilis bekitse, óńirlik deńgeıde máslıhat bekitedi.

Biz, máslıhat depýtattary, ózimiz ashyq bolýymyz kerek. Únemi brıfıngter, baspasóz konferentsııalaryn ótkizeıik. Biz jýrnalısterden qoryqpaýymyz kerek, kerisinshe olarmen syndarly túrde yntymaqtasýymyz kerek. Úshinshiden, stýdenttermen kezdesip, jastarǵa depýtattarmen birlesip jumys isteýge múmkindik berýge shaqyramyn», - dedi Ásııa Aqanova.