Depýtat «Altyn belgige» úmitker túlekterdiń múddesin qorǵaý kerektigin málim etti
ASTANA. Maýsymnyń 9-y. QazAqparat - Búgin Parlament Májilisiniń jalpy otyrysynda depýtat Ramazan Sárpekov Bilim jáne ǵylym mınıstri Janseıit Túımebaevqa saýal joldady,
dep habarlaıdy QazAqparat.
Maýsymnyń 4-i kúni bastalǵan ulttyq biryńǵaı testileý jumysy - búgingi tańda qoǵamdaǵy erekshe nazarda turǵan jaǵdaı jáne úlken ómir jolyna daıarlanyp júrgen mektep túlekteri úshin psıhologııalyq jaǵynan jaýapkershiligi joǵary kezeń.
Al onyń ishinde 11 jyl mektepte tek qana úzdik oqyp, «Altyn belgige» úmitker bolyp otyrǵan oqýshyǵa jáne oǵan tileýles bolyp júrgen ata-anasyna, týystary men mektep ustazdary úshin jaýapkershiligi odan da joǵary ekeni anyq.
«Sondyqtan da bolar, oqýshylardyń test tapsyrýǵa degen senimderin arttyrý maqsatynda ózińiz Almatyda, al orynbasaryńyz Astana qalasynda mektepterdi aralap, kezdesýler ótkizip, túsinik berip shyqtyńyz. Bunyń bárin ata-analar da, oqýshylar da jaqsy qabyldap otyr. Onyń ústine biryńǵaı test tapsyrý máselesi de jetildirilip keledi. Kóptegen keleńsiz áńgimelerdiń joıylǵanyn kópshiligi bilip otyr. Ókinishke qaraı, «Altyn belgige» úmitker birneshe túlek testiń nátıjesi boıynsha, bir-eki baly jetpeı qalǵandyqtan (basym kópshiligi matematıka páninen), kómek bolar degen úmitpen apellıatsııalyq komıssııaǵa bergen ótinishteri qanaǵattandyrylmaı qalyp jatyr. Osyǵan renish bildirgen oqýshylar «Onda apellıatsııanyń qajeti qansha?» dep suraq qoıady. Qurmetti Janseıit Qanseıituly, «Altyn belgige» úmitker, bir-eki baly jetpeı otyrǵan oqýshylardyń múddelerin qorǵaı otyryp, osy máseleniń oń sheshilýine kómek jasaýyńyzdy ótinemin»,- dedi mınıstrge saýal joldaǵan depýtat R.Sárpekov.
