Depýtat Almaty halyqaralyq áýejaıyna Dinmuhamed Qonaevtyń atyn berýdi usyndy

NUR-SULTAN. QazAqparat - Májilis depýtaty Erlan Smaılov Almaty qalasyndaǵy halyqaralyq áýejaıǵa Dinmuhamed Qonaevtyń atyn berip, iri qalalarda yǵy-jyǵy qurylys salýǵa tyıym salýdy usyndy, dep habarlaıdy QazAqparat tilshisi.

«Úkimetke eldiń Nur-Sultan, Almaty sııaqty iri qalalarynda yǵy-jyǵy qurylystarǵa zańnama deńgeıinde tyıym salý qajet. Ahýal shekten shyǵyp barady, jergilikti ákimdikter jaǵdaıdy ıgere almaı otyr. Keı jaǵdaıda óz áreketimen ahýaldy ýshyqtyrýda. Ákimdikter men qurylysshylardyń sheshimdi ylǵı kýlýarda sheshýi qala turǵyndarynyń ádiletti narazylyǵyn týǵyzyp, ózderin jaısyz sezinýge sebepker boldy. Prezıdenttiń tapsyrmasyna qaramastan, Almatyda bul másele sheshilip jatqan joq. Almaty qalasy ákimdiginiń qazirgi quramyna aldyńǵylardan qolaısyz jobalar qalǵan. Úkimet deńgeıinde júıeli sheshim qajet. Shyn máninde bul - aısbergtiń sý betindegi kórinisi ǵana», - dedi depýtat Premer-Mınıstrdiń birinshi orynbasary Roman Sklıardyń atyna joldaǵan saýalynda.

Aıtýynsha, sáýlet-qurylys salasyna birqatar túıtkildi máselelerdiń jıyntyǵy boıynsha tártip ornatý qajet.

«Ákimdikterdiń sáýlet-qurylys salasyna qatysty sheshimderi ashyq shyǵarylmaıdy. Sheshim shyǵarý kezinde qala turǵyndarynyń, sáýletshiler men ýrbanısterdiń pikiri eskerilmeıdi. Kólik, áleýmettik ınfraqurylym qajettigin eskerýsiz sheshim qabyldanady. Qurylys kompanııalarynyń jergilikti atqarýshy organdardy manıpýlıatsııalaýynyń saldarynan qalalyq orta men jasyl aımaqtar degradatsııalanyp, qalalardyń qurylysy júıesiz júrip, «adam ıleýleri» paıda bolyp jatyr. Jalpy qalalyqtardyń ómir sapasy nasharlady. Osylaısha qurylys kompanııalary tabysqa kenelip, turǵyndar men ákimdikter problemalarǵa tap kelip jatyr. Makrodeńgeıde bul jaǵdaı qalalardyń teńgerimmen damýyna jáne ulttyń ekonomıkalyq, kreatıvti ósý ortalyǵyna aınalýyna kedergi keltiredi», - dedi ol.

Depýtattyń paıymynsha, bul jaǵdaı «halyq únine qulaq asatyn memleket» tujyrymyna túbirimen qaıshy.

«Sondaı-aq, Almaty turǵyndarynyń bastamasyn qoldaı otyryp, Memleket basshysynyń Qapshaǵaı qalasynyń ataýyn ózgertý bastamasynyń jalǵasy retinde Úkimetke Almaty qalasyndaǵy halyqaralyq áýejaıǵa Dinmuhamed Qonaevtyń atyn berýdi usynamyz», - dedi depýtat.

Májilistiń búgingi jalpy otyrysynan keıin spıker Erlan Qojanov Tuńǵysh Prezıdent týraly Zań qashan kúshin joıatynyn aıtty.