Depýtat Almatydaǵy bazarlarda saýdagerler qandaı problemaǵa tap bolǵanyn málim etti
Búgin Májilistiń jalpy otyrysynda Nartaı Sársenǵalıev «Kenjehan» bazaryndaǵy saýdagerlerdiń problemasyn jarııalady, dep habarlaıdy Kazinform.
«Búgingi depýtattyq saýalyma ádiletsizdiktiń shyrmaýyna shyrmalyp, shyrǵalańnan shyǵa almaı qalǵan azamattardyń kóz jasy sebep. Olar Almatynyń áıgili «baraholka» bazarynda saýda jasaıtyn qandastar. Qaqaǵan qys pen mı qaınatar jazda, tań atysy kesh batysy konteınerde otyryp, saýda jasaýǵa májbúr jandardy ózin qojaıyn sezingen ekiniń biri kelip tonap jatyr. Bizge joldaǵan hatynda «Kenjehan» bazarynyń saýdagerleri bar máselesin tizip jazǵan. Búginge deıin quzyrly oryndarǵa qansha aryzdansa da, kópshilik qanalǵan qarjysyn qaıtara almaı keledi», - dedi N. Sársenǵalıev Qarjy mınıstrligi men Bas prokýratýraǵa joldaǵan saýalynda.
Bul rette ol atalǵan bazarlardaǵy máseleni kóterdi.
«Baraholkadaǵy saýdagerlerden depýtattardyń atyna kelgen myna aryzǵa súıensek, sońǵy 10 jylǵa jýyq ýaqytta «Kenjehan» bazarynyń ıesi Nazarbaeva Ánıpa Ábishqyzy bolǵan delinedi. Onyń janyndaǵy adamdar bazardaǵy ár saýda ornyn 10 myń AQSh dollaryna satqan. Alaıda satý-satyp alý jónindegi kelisimshartty jasamaı, tek konteınerdiń pasportyn bergen. Kelisimshart talap etken jandardy «biz bazarǵa máńgi ıelik etemiz, ýaıymdamańdar» dep qaıtarǵan. Saýdagerlerdiń dereginshe, atalǵan bazarda 1000-ǵa jýyq konteıner bar, ári qaraı esebin shyǵara berińizder. Qolda bar aryzdaǵy aqparatqa súıensek, 2022 jyldyń 4 sáýirinde «Kenjehan» bazarynyń 100 paıyz úlesi «Mıtra «konsaltıng» JShS men Rozenberg E.M. degen azamatqa ótken. Bul bazar 640 mıllıon teńgege satyldy delinedi. Jańadan kelgen bazar qojaıyndary saýdagerlerge «konteınerlerińdi 325 myń teńgeden satyp alyńdar» dep talap qoıǵan. Sonda olar 1 orynǵa eki ret aqsha tólegen. Amalsyz aqshasyn bergen jandarǵa taǵy da satý-satyp alý týraly qujat berilmegen, tek «kelesim» qaǵazy tapsyrylǵan», - dedi depýtat.
Kelisimdi sol bazardaǵy notarýıste jasaýǵa mindettegen, ol úshin ár saýdager taǵy 43 myń teńgeden tólegen.
«Ár konteınerdiń ıesinen aıyna 50 500 teńge aqy alynady degen taǵy bir tártip shyǵypty. Muny shaǵymdanǵan el aıtyp otyr. Bul soraqylyq emes pe? «Tólemese konteınerlerdi mórlep, jaýyp tastaıdy» dep ashynady jurt. Saýdagerlerdiń 3 talaby bar. Birinshiden, bir konteınerge 2 ret aqsha tólegen jurt burynǵy nemese búgingi bazar ıesindegi aqshany qaıtaryp bersin deıdi. Bir saýda ornyna eki ret aqsha tóleý aqylǵa syımaıdy. Ekinshiden, aı saıyn qosymsha qarjy jınaý men jumys oryndaryn mórlep jaýyp tastaýǵa qatysty áreketterdiń zańdylyǵyn tekserip, shara qoldanylsyn deıdi. Úshinshiden, «Kenjehan» bazaryn Almatydaǵy Memlekettik kirister departamenti teksergen, sonyń nátıjelerin Qarjy mınıstrligi usynsyn. Osy depýtattyq saýaldy daıyndaý barysynda baraholkadaǵy «Rahat jáne «Evrazııa» bazaryndaǵy saýdagerler de shaǵymdaryn jetkizdi. Sondyqtan eldegi barlyq bazardaǵy zańdylyqty tekserý kerek dep esepteımin», - dedi Nartaı Sársenǵalıev.
