Depýtat Almatyda 40 qabatty keshen salýǵa qarsy

ALMATY. KAZINFORM – Májilis depýtaty Sergeı Ponomarev Almatyda Seıfýllın dańǵyly men Tımırıazev kóshesiniń qıylysynda salynyp jatqan 40 qabatty ǵımarat qurylysyna qarsy shyqty.

Depýtat áleýmettik jelidegi paraqshasynda bul aýmaqta záýlim munaradan bólek taǵy bes 10 qabatty úı salý josparlanyp otyrǵanyn jetkizdi.

– Iá, túsinemiz: bul sharshy metrler, salyqtar, jumys oryndary ashylady. Biraq dál osy jerde osyndaı úlken keshen turǵyzýdyń qajeti qansha? Qurylys qala ınfraqurylymyna orasan zor aýyrtpalyq túsiredi. Sebebi bul aýdan onsyz da kólik keptelisine jıi ushyraıdy. Bul aımaqta onsyz da mektep, aýrýhana jetpeı jatyr, – dep atap ótti depýtat. 

Onyń aıtýynsha, halyqqa demalys orny, saıabaqtar, áleýmettik nysandar kerek. Sondaı-aq, depýtat osyǵan deıin qurylys kompanııasynyń basqa jobasynda áleýmettik nysandar – mektep pen aýrýhana turǵyzýǵa ýáde bergenin eske saldy. Biraq ýáde etilgen nysandar áli kúnge deıin salynbaǵan.

— Bizge Kishi Almaty ózeniniń boıyndaǵy Jandosova kóshesinen Ótepov kóshesine deıingi 7,5 gektar aýmaqtaǵy 2,5 shaqyrym saıabaqty abattandyrýǵa, kógaldandyrýǵa jáne damytýǵa ýáde berdi. Al biz ne kórip turmyz? Jeke sektor buzylǵan joq, eshteńe istelmegen: qalaǵa ýáde etilgen mektep te, aýrýhana da, transformatorlyq qosalqy stantsııa da joq. Ókinishke qaraı, osy jerde de osyndaı jaǵdaı bola ma dep qorqamyz, - dedi depýtat.

Qazir bul jańa jobasy memlekettik saraptamadan ótip jatyr. Depýtat Sergeı Ponomarev jobany qaıta qaraý kerektigin aıtyp, qalalyq bılik ókilderiniń aldyna naqty suraqtar qoıatynyn jetkizdi. 

Osyǵan deıin depýtat Almatyda bıýdjetten 1,5 mlrd teńge jumsap salynǵan krematorıı Densaýlyq saqtaý mınıstrligine kerek bolmaı qalǵany týraly aıtqan bolatyn.