Depýtat áleýmettik turǵyn úıge kezekti azaıtýdyń jolyn aıtty
«Qazirgi ýaqytta turǵyn úı kezeginde 540 myń azamat tur. Turǵyn úı qurylysynyń joǵary qarqynyna qaramastan, áleýmettik turǵyn úıge kezek azaımaıdy, al keı jerlerde tipti ósip keledi. Bul kezekte turǵan barlyq adamdardyń talaptary qashan tolyq oryndalatynyn eshkim aıta almaıdy. Máselen, Memleket basshysy
Q.K. Toqaevtyń tapsyrmasy boıynsha halyqtyń asa osal toptaryna turǵyn úı qaryzdaryn berý úshin 5-10-20 «Shańyraq» baǵdarlamasy iske qosyldy, onyń operatory «Otbasy bank» AQ bolyp sanalady.
Alaıda, baǵdarlamanyń sharttary kópbalaly, jalǵyz basty
ata-analar, 1 jáne 2-toptaǵy múgedekter, jetim balalar sııaqty sanattarǵa qoljetimsiz. Kelip túsken 37 myń ótinimniń nebári 1500-i ǵana maquldanǵan», - dedi depýtat Úkimet basshysy Asqar Mamınniń atyna joldaǵan saýalynda.
Osy oraıda ol nyń sebepterine toqtaldy. Birinshiden, baǵdarlama boıynsha nesıe alý úshin sońǵy 6 aıdaǵy eńbek nemese kásipkerlik qyzmetten túsken otbasynyń kirisin rastaý qajet. Ádette, mundaı talapty bankter klıenttiń tólem qabilettiligin rastaý úshin qoıady. Alaıda, azamattardyń osal sanattarynyń, kóbinese, járdemaqylar men zeınetaqylardan basqa, múldem eshqandaı resmı kirisi joq. Bul rette olardyń kóbi turǵyn úı jaldap, aı saıyn jalǵa alý aqysyn tóleýge 50-100 myń teńge izdestirýge májbúr. Bul somany olar turǵyn úı qaryzyn óteýge jibere alar edi.
«Sonymen birge jaqsy kredıttik tarıh olardyń tólem qabilettiliginiń ólshemi bola alar edi. Óıtkeni, kiristerin rastamaı, olarǵa joǵary paıyzben taýarlyq kredıtter men mıkroqarjy uıymdarynyń kredıtteri ǵana qoljetimdi bolady. Bul rette olar kredıttik tarıhyn búldirmeý úshin olardy ýaqytynda tóleıdi. Kepilsiz jáne qymbat kredıtterdi ýaqtyly qaıtaratyn boryshkerler – tártipti, olardyń baǵdarlamaǵa qatysýy múmkin dep sanaımyn. Bul týraly jınalystarda saılaýshylar da: «Bizge memleketten baspana kerek emes, ony ıpotekaǵa satyp alýǵa múmkindik berseńizder boldy!» dep suraǵan bolatyn», - dedi S. Imasheva.
Depýtat ekinshi sebepke toqtala kele, turǵyn úıdi bastapqy naryqta ǵana satyp alýǵa bolatynyn, biraq jańa turǵyn úıdiń baǵasy óte joǵary ekenin aıtty. «Shańyraq» baǵdarlamasy boıynsha óńirlerde qaryzdyń eń joǵary somasy 12 mıllıon teńgeni quraıdy. Bul baǵamen jańa salynǵa úıden 1-2 bólmeli páterdi ǵana satyp alýǵa bolady, biraq onyń ózi de joq. Óıtkeni, mundaı turǵyn úı qurylys salý kezeńinde satyp alynady. Jergilikti atqarýshy organnyń qarajaty esebinen salynatyn arzan turǵyn úı de jetkiliksiz.
«Qaıtalama naryq suranysty ishinara qanaǵattandyrar edi. Baǵdarlamanyń maqsaty - áleýmettik turǵyn úı alýǵa kezekti qysqartý. Qurmetti Asqar Uzaqbaıuly, osy saýal arqyly Sizden halyqtyń áleýmettik jaǵynan osal sanatyndaǵy azamattarǵa turǵyn úı satyp alý úshin múmkindikterdi keńeıtýdi jáne 5-10-20 «Shańyraq» baǵdarlamasynyń sharttaryn qaıta qaraýdy suraımyn», - dedi S. Imasheva.
Osy oraıda ol azamattardyń osal sanattaryna turǵyn úı qaryzdaryn kirisin rastamaı, olardyń tólem qabilettiligin qosymsha parametrler boıynsha baǵalaı otyryp alýǵa múmkindik berýdi, sondaı-aq baǵdarlama boıynsha turǵyn úıdi jyljymaıtyn múliktiń qaıtalama naryǵynan satyp alý múmkindigin qamtamasyz etýdi surady.
