Depýtat Aqmaral Álnazarovaǵa: Senator kezińizde ózińiz synaǵan buıryqty áli ózgertpeı otyrsyz

ASTANA. KAZINFORM – Májilis depýtaty Baqytjan Bazarbek Mindetti medıtsınalyq saqtandyrý qorynyń qarajatyn jymqyrýǵa jol ashatyn ishki qujattardy atap, Densaýlyq saqtaý mınıstri Aqmaral Álnazarovany osy buıryqtardy ózgertpeı júrgeni úshin synady.

– Mindetti medıtsınalyq saqtandyrý qory tapsyratyn qarjy esebi qalaı nege jalpy qarjy esebinen tys qalyp otyr? Osylaısha atalǵan qor zań boıynsha qarjy esebin júrgizbeı otyrǵan bolyp shyǵady. Qoldan qosyp jazý, qarjy aqaýlary sııaqty búrkemelengen qarjy jymqyrý faktileri osy tustan týyndap jatyr. Bul – meniń kózqarasym emes, Joǵary aýdıtorlyq palatanyń qorytyndysy. Aýdıtorlyq palata Densaýlyq saqtaý mınıstırliginiń 2017 jyldyń 16 tamyzyndaǵy buıyrǵyna silteme jasaıdy. Bul buıryq zańǵa qaıshy. Siz mınıstr bolyp aqpan aıynda (2024 jyly – red.) kelgen edińiz. Sodan beri ne osy buıryqtyń kúshin joımadyńyz, ne ózgertpedińiz, - dedi ol Májilistiń jalpy otyrysynda.

Aıtýynsha, vedomstvonyń №321 buıryǵy da saladaǵy bassyzdyqtardyń kózi bolyp otyr.

– Aldyńyzda Mindetti medıtsınalyq saqtandyrý qoryndaǵy sybaılas jemqorlyqtyń qaınar kózi tur. Bul – 2020 jyldyń 24 jeltoqsanyndaǵy №321 buıryq. Qujat sybaılas jemqorlyq táýekeli men jymqyrýǵa jol ashyp tur. Bul buıryqtyń siz qabyldamaǵanyńyzdy bilemin. Biraq 6 aqpanda (2024 j. – red) mınıstr bolyp keldińiz ǵoı. Buıryqqa túzetý nemese ózgeris engizýińiz kerek edi. Ony isteıtin bizdiń quzyretimiz joq. Mınıstr retindegi quzyretińiz bul. Onyń ústine siz senator bolyp júrgende dál osy buıryqty jıi synaıtyn edińiz, - degen depýtat mınıstrdiń aýzynan shyqqan keıbir málimetterdiń rastyǵyna kúmán keltirdi.

Óz kezeginde Májilis depýtaty mınıstrden buıryqtyń kúshi qashan joıylatynyn surady. 

– Murat Ábenovtiń suraǵyna bergen jaýabyńyzda zań buzǵandardy lıtsenzııasynan aıyryp, materıaldardy tıisti organdarǵa joldap jatqandaryńyzdy aıttyńyz. Meniń qolymdaǵy aqparat boıynsha, Joǵary aýdıtorlyq palata qorytyndysynda zań talabyn óreskel buzǵan ondaǵan JShS bar. Solardyń eshbiri lıtsenzııasynan aıyrylmaǵan. Qatań shara qoldanylmaǵan. Bul buıryqtyń kúshin qashan joımaqshysyz, - dep surady Baqytjan Bazarbek.

Mınıstr depýtat aıtqan buıryqtyń joıylmaıtynyn qadap aıtty.

– Siz kóterip otyrǵan problema – shynymen de júıelikp problema. Biz de júıeniń ashyq bolǵanyna múddelimiz. Qordyń da, medıtsınalyq uıymdardyń ashyq esep berip otyrǵany bizge de kerek. №321 buıyrqqa kelsek, onyń kúshin joımaımyz. 1 shildege deıin buıryqqa ózgeris engizemiz. Biz siz aıtyp otyrǵan aqaýlardy kórip otyrmyz. Ol aqaýlar týraly materıaldardy tıisti organdarǵa joldaımyz. Qarjy esebinen tys qalǵan qarajatqa kelsek, siz aıtqan ekinshi buıryqtyń máselesin de osy zań jobasynyń ekinshi oqlymyna deıin bir sheshimge kelemiz dep oılaımyn, - dedi mınıstr.

Sondaı-aq ol Joǵary aýdıtorlyq palatanyń qorytyndysynda kórsetilgen kemshilikter boıynsha Bas prokýratýra, oblystyq prokýratýralar sııaqty tıisti organdarǵa materıal joldaǵanyn qaıtalap aıtty. 

– Bizdiń taraptan keri baılanys ylǵı da belsendi bolmaǵan shyǵar. Biraq búginde bul máseleni baqylaýǵa aldyq, - dedi Aqmaral Álnazarova.

Buǵan deıin taǵy bir Májilis depýtaty Ashat Aımaǵambetov byltyr eldiń densaýlyq saqtaý júıesi memleketten shamamen 500 mlrd teńge kem alǵanyn málim etken edi.