Depýtat agrarlyq salada oqıtyn stýdentterdiń stıpendııasyn ósirýdi surady
«Aýyl sharýashylyǵy mamandyqtarynyń mártebesin arttyrýdyń birden-bir joly – osy mamandyqtar boıynsha oqıtyn stýdentter men magıstranttardyń stıpendııasyn kóterý. Osy másele tóńireginde taıaýda «Aýyl» partııasy fraktsııasyna Qazaq ulttyq agrarlyq zertteý ýnıversıtetiniń bir top stýdenti hat joldady, hatqa eki júzge jýyq stýdent qol qoıǵan. Atalǵan oqý ornynda alty myńnan astam stýdent bilim alady, olardyń basym bóligi – aýyl jastary. Hatta shákirtaqynyń tómen bolýyna baılanysty kóp stýdentter oqýdan ketip jatqany týraly jazylǵan», - dedi Q. Ábden Úkimet basshysynyń orynbasary Altaı Kólginovtiń atyna joldaǵan saýalynda.
Onyń aıtýynsha, qazirgi kezde qoldanystaǵy zańnamaǵa sáıkes pedagogıkalyq jáne medıtsınalyq mamandyqtar boıynsha oqıtyn stýdentterdiń stıpendııasy – 58 800 teńge. Eske salsaq, 2021 jyly Prezıdenttiń tapsyrmasymen pedagogıka jáne medıtsına mamandyqtarynda oqyp jatqan stýdentterdiń stıpendııasyn arttyrý týraly sheshim qabyldanǵan. Bul qadam jaqsy nátıjesin berdi.
«Basqalary, onyń ishinde aýyl sharýashylyǵy mamandyqtarynyń stýdentteri 38 protsentke tómen, ıaǵnı 36 660 teńge alady. Aıyrmashylyq 22 140 teńgege jetti. Bir qaraǵanda, aıtarlyqtaı kóp emes, biraq aýyldan shyqqan stýdent úshin munyń ózi jaqsy kómek bolar edi. Sebebi, bul mamandyqtarda negizinen aýyldan shyqqan balalar oqıdy, olardyń ata-anasynyń da jalaqysy joǵary emes ekeni aıtpasa da túsinikti. Sondaı-aq, bıyl respýblıka boıynsha «Aýyl sharýashylyǵy jáne bıoresýrstar» men «Veterınarııa» baǵyty boıynsha bólingen 2 400 memlekettik grantqa suranys bolmaǵan.
Jyl saıyn bul salada maman tapshylyǵy artyp keledi. Jalpy aıtqanda, elimizde aýyl sharýashylyǵynyń túrli baǵyttary boıynsha tórt myńǵa jýyq maman jetispeıdi. Ásirese, veterınar, mehanızator, vettehnık, kásibı tehnıkanyń tilin biletin maman tabý qıyn», - dedi depýtat.
Bul turǵyda ol aýyl sharýashylyǵy mamandyqtary boıynsha bilim alyp jatqan stýdentterdiń stıpendııasyn pedagogıkalyq jáne medıtsınalyq baǵyt boıynsha oqıtyn stýdentterdiń stıpendııasymen teńestirý máselesin qarastyrýdy surady.
