Depýtat Abdrahmanov advokattar alqasynyń tóraǵasyna oıdy qazaqsha «dostýpno» jetkizýdi surady

ASTANA. QazAqparat - Búgin Parlament Májilisindegi Úkimet saǵytynda Respýblıkalyq advokattar alqasynyń tóraǵasy Ánýar Túgeldiń bergen jaýaptaryna depýtattar narazylyǵyn bildirdi, dep habarlaıdy QazAqparat.

«Depýtattyń suraǵyna jaýap qaıtara otyryp, «hochý otvetıt na rýsskom ıazyke, tak býdet dostýpnee» degenińizdi qalaı túsinýge bolady? Depýtat Magerramovtyń (Magerram Mamedovıch) suraǵyna da jaýap bergen kezde de sol logıka boıynsha sóıledińiz. Sonda sizdiń pikirińizshe, jaýapty qazaq tilinde qaıtarǵanda oıdy «dostýpno» jetkizýdiń múmkindigi joq pa?!»,-dep atap ótti depýtat Saýytbek Abdrahmanov Respýblıkalyq advokattar alqasynyń tóraǵasyna qaratyp aıtqan sózinde.

Óz kezeginde Májilis vıtse-spıkeri Vladımır Bojko depýtat S. Abdrahmanovtyń eskertýin quptaıtynyn aıta kele, memlekettik tildi meńgerýdi jalǵastyrý qajettigin jetkizdi.

«Ýaqyt ótken saıyn qazaq tilin qoldaný barlyq jerlerde ósip keledi. Sondyqtan barshamyzǵa shyńdalý kerek, onyń ishinde maǵan da memlekettik tildi meńgerý deńgeıin jetildire túsý qajet», - dedi V. Bojko.

Úkimet saǵaty barysynda bul máselede depýtat Qýanysh Sultanov Prezıdenttiń elimizdiń rýhanı jańarýǵa baılanysty maqalasynda kóterilgen ulttyq tutastyq turǵysyndaǵy máselege nazar aýdarý qajettigin aıtty.

«Biz osyndaı oǵashtyqtardan ósýimiz kerek.  Memleketimizdiń rýhanı, ulttyq tutastyǵyna qatysty barlyq oryndar, ıaǵnı atqarýshy bılik, zań shyǵarýshy bıilik, advokattar jáne  notarıattar bolsyn osy qadamdardy túsinip jasaýy kerek», - dedi Sultanov.