Depýtat A.Turtaev áleýmettik jelilerdegi keleńsizdikterdi zertteıtin komıssııa qurýdy usyndy
ASTANA. QazAqparat - Áleýmettik jelidegi keleńsizdikterdiń qoǵamǵa zııanyn zertteıtin arnaıy komıssııa qurylýy kerek. Búgin Parlament Májilisiniń jalpy otyrysynda depýtat Almas Turtaev osy máseleni kóterdi.
Sóz arasynda depýtat elimizde ınternet paıdalanýshylar sany jyl sanap artyp otyrǵanyn alǵa tartty. Onyń aıtýynsha, osydan on jyl buryn ınternet paıdalanýshylar sany halyqtyń jalpy sanyna tórt paıyzdy qurasa, byltyrǵy málimet boıynsha 6-74 jas aralyǵyndaǵy paıdalanýshylar sany 63,9 paıyzǵa jetken. «Azamattarymyz álemdik ınternetti paıdalaný úderisinen eshkimnen kesh qalǵan emes, jetekshi áleýmettik jelilerdi paıdalanyp ártúrli aqparattarǵa qol jetkizip otyr. Osylaısha, azamattar ishki suranystaryna qatysty barlyq aqparattardy áleýmettik jeliden alyp, taratyp, bólisip jatyr. Bul jeliniń jaqsy jaǵy. Al onyń ekinshi jaǵy bar. Ókinishke qaraı áleýmettik jelide eldiń úreıin ushyratyn aqparattar taratyp, túrli zań buzýshylyqqa jol beretin, ásire anaıy toptar qurý, qoǵamǵa qaýipti toptar qurý faktileri de kezdesedi», - deıdi depýtat Turtaev.
Onyń aıtýynsha, bul másele jastardyń durys tárbıe alýyna keri áserin tıgizedi. Sondaı jaǵymsyz úderis saldarynan ózine-ózi qol jumsaý, quqyq buzýlarǵa barý sekildi faktiler de jıilegen. Budan bólek, depýtat áleýmettik jelide bóten adamdy kemsitý, basqanyń abyroıyna, qadir- qasıetine ádepsiz túrde nuqsan keltirý jıilep ketkenine de alańdaýshylyq bildirdi.
«On tórt jasqa deıingi jasóspirimder arasyndaǵy azǵyndyq pen zorlyq is-áreketteri osydan bes jyl buryn 110 bolsa, 2015 jyldyń 10 aıynda 700-ge jýyq osyndaı qylmys tirkelipti. Bul áleýmettik jelide jynystyq qatynas, zorlyq sekildi qylmystardy ashyq nasıhattaý, azǵyndyqqa úndeý, sol arqyly rýhanı azǵyrýǵa ıtermeleýdiń áserinen de bolýy múmkin. Jastardyń túrli aǵymnyń jetegine ketýine de áleýmettik jeliniń yqpaly bar ekeni barshamyzǵa málim. Osynyń ózi áleýmettik jeliniń jumysyn retteý qajettiligin kórsetedi. Bul bolashaǵymyzǵa, qaýipsizdigimizge tikeleı baılanysty. Sondyqtan da áleýmettik jelidegi osy keleńsizdiktiń qoǵamǵa zııanyn zertteý úshin arnaıy komıssııa qurylsa ıgi», - dedi depýtat Almas Turtaev.
