Depýtat A. Bekenov elimizdegi dinı ahýalǵa alańdaýshylyq bildirip, UQK tarapynan dinı aǵymdarǵa qatysty baǵa berýin surady

Qazaqstan Respýblıkasynyń Ulttyq qaýipsizdik komıtetiniń tóraǵasy Nurtaı Ábiqaevqa depýtattyq saýal joldady

. Onda depýtat respýblıka óńirlerin dúrliktirip jatqan dinı aǵymdardyń týdyrǵan jaǵdaıyna Úkimet, Ulttyq qaýipsizdik komıteti tarapynan taldaý jasap, baǵa berýin surady.

«Qazaqstandaǵy negizgi qaýipti qubylys «ýahhabılik» aǵymnyń artynan erip ketýshilerdiń sany kóbeıip, «sáláfı» aǵymynyń keńinen nasıhattalýy kóńilge qorqynysh uıalatady. Osyndaı ahýaldyń saldarynan elimizdegi jastardyń birqatary osy aǵymǵa ere bastaǵan», deıdi depýtat. Sonymen birge, A. Bekenov bundaı aǵymǵa ergenderdiń sábılerin tıisti medıtsınalyq, dárigerlik tekserýden ótkizýden bas tartyp jatqanyn, mektep jasyndaǵy uldar men qyzdar arasynda mýzyka tyńdaý haram sanalyp, Án urandy tyńdamaý, memlekettik Týǵa qurmet kórsetpeý, áskerı boryshty ótemeý sekildi teris uǵym qalyptasqanyn tilge tıek etti. Sondaı-aq, depýtattyń sózine qaraǵanda, elimizde sońǵy kezderi 12-16 jastaǵy qyz balalardyń sabaqty tastap ketýi men ata-anasynyń ruqsatynsyz neke qııý faktileri ushyrasyp otyr.

Sonymen qatar, A. Bekenov qazirgi kezde mektep pen joǵary oqý oryndarynda, eńbekpen túzetý mekemelerinde hızbýt tahrır, takfır sekildi jalpy ýahhabızm ıdeologııasymen ýlanǵandar óz jumystaryn kedergisiz ashyqtan ashyq júrgizip jatqanyna toqtalyp, birqatar mysaldardy aldyǵa tartty. «Jalpy, dinı ahýalǵa qatysty máseleler elimizdiń barlyq aımaqtarynan kórinis berip otyr. Ásirese, Batystaǵy jurt qatty alańdaýda. Ár túrli ataýmen atalyp, «dinsizderge qarsy ádiletti soǵys» bastaýdy maqsat tutqan olar, qarý-jaraqtarmen jabdyqtalyp mekemeler men adamdardy tonap, qoǵam men memleketke zııan keltirýde. Dinı ahýaldy baqylaýda ustaý úshin jergilikti organdar júrgizip jatqan sharalar nátıje bermeýde. Óıtkeni, bul saladaǵy qyzmet zańnamalyq turǵydan qamtylmaǵan, ıaǵnı dástúrsiz dinı birlestikterdiń keıbir zańsyz áreketterine quqyqtyq tosqaýyl qoıý múmkindigi shekteýli. Al tek qana nasıhattyq jumystar arqyly qoǵamdyq sanany retteý múmkin emes. Respýblıkamyzdaǵy ıslam dini qyzmetkerleriniń kóbiniń dúnıe tanymy bir ǵana din aınalasynda óte tar deńgeıde jáne qazirgi qoǵam ómirindegi suranysqa jaýap bere almaýy da jasyryn emes. Meshit ımamdary kezdesýler kezinde ıslam dininiń aýmaǵyndaǵy jalpy adamı qundylyqtardan basqa máselelerden aspaıdy. Sonymen qatar, «Dintaný» pánin eldik múdde turǵysynan tıimdi paıdalaný maqsatynda, mektepterdegi din taný sabaqtaryna shekteý qoıyp, oqytatyn mamandardyń bilim deńgeıi, kózqarasy men ustanymy turǵysynan saraptama jasap, eń aldymen joǵary bilikti ustaz daıarlap baryp iske asyrǵan jón dep esepteımin. Budan bólek, respýblıkalyq radıo jáne telearnalarda, radıkaldyq aǵymdar jóninde naqty habarlar berilýi qajet. Qazaqstanda din bólek, memleket bólek, memleket din isine aralaspaıdy. Sonda da Prezıdentimiz búkil álem dinderiniń basyn qosyp, tatýlyqqa shaqyryp jatqan kezde el óńirlerin dúrliktirip jatqan jaıǵa Úkimet, Ulttyq qaýipsizdik komıteti tarapynan taldaý jasap, baǵa berýin suraımyn», dedi depýtat.