Depressııaǵa ushyraý álemniń kóptegen elderin jaılap barady
ASTANA. QazAqparat - Dúnıejúzilik Densaýlyq saqtaý uıymy 2015 jyly álem boıynsha depressııanyń eń kóp taraǵan aýrýǵa aınalatynyn aıtyp otyr. Tıisti sharalar qabyldanbasa, 2020 jylǵa qaraı derttiń bul túri damyǵan eldermen qosa damýshy elderdiń de ekonomıkalyq ósimine keri áserin tıgizbek, dep jazady khabar.kz.
Alaıda adamdardyń qıyndyqqa tótep berý qasıetin arttyrýǵa arnalǵan dári-dármekterge qatysty pikirler alýan túrli. Eýropada antıdepresanttarǵa arnalǵan ruqsat qaǵazdardyń sany jyl sanap 20 paıyzǵa artýda. Al adamdardyń óz-ózine qol jumsaýy nebári 0,8 paıyzǵa azaıǵan.
Qolda bar málimetterge qaraǵanda, jyl saıyn 60 myńdaı eýropalyq ómirimen qosh aıtysyp jatady. Al depressııaǵa qarsy dári-dármekterge táýeldi adamdardyń qatary sharyqtap ketken.
Psıhotroptyq zattardyń 80 paıyzyn qoldanatyn Batys Eýropa elderimen qosa AQSh pen Kanadada antıdepresanttardy kóbine bilikti psıhıatrlar emes, jalpy tájirıbelik dárigerler belgilep beredi. Kúızeliske qarsy dári-dármekterdi ómir súrý deńgeıi joǵary skandınavııalyqtar qoldanady eken. Bul oraıda Shvetsııa alǵa ozǵan. Munda sońǵy 20 jylda júıke júıesiniń tozýyna qarsy preparattardy qoldaný 1000 paıyzǵa artqan. 2 orynda Danııa, al 3 orynǵa Portýgalııa eli taban tiregen. Búginde bul tizimde 4 orynda turǵan Ulybrıtanııada árbir onynshy adam kúızeliske tótep bere almaı, túrli dári-dármekterdi qoldanady eken.
Tumandy Alboın elinde sońǵy 10 jylda antıdepressanttardy qoldanatyn adamdardyń sany 2 esege artqan. Ótken jyldyń ózinde brıtanııalyq dárigerler 55 mıllıon adamǵa osyndaı dári-dármekti qabyldaýǵa ruqsat beripti.
Depressııa - júıke aýrýlarynyń arasynda eń keń taraǵan dert. Oǵan 350 mıllıonnan astam adam shaldyqqan. Dúnıejúzilik densaýlyq saqtaý uıymynyń mamandary ony jańa indet dep te atap júr. Alaıda muny bos sandyraq degendi alǵa tartatyn ǵalymdar bar. Ulybrıtanııa psıhıatrlary bul dárilerdi beıbereket qabyldaýǵa bolmaıtynyn aıtyp, táýeldilikten qutylýǵa keńes berip otyr.
