Depozıtterge salyq salynady degen ras pa
ASTANA. KAZINFORM — Úkimette mundaı salyq engizý máselesi qarastyrylyp jatqan joq.
Buǵan deıin resmı túsindirme berilgenine qaramastan, Jalǵan aqparatqa qarsy is-qımyl ortalyǵy áleýmettik jelilerde jeke tulǵalardyń depozıtteri boıynsha syıaqyǵa salyq engiziledi degen jalǵan aqparat pen túrli manıpýlıatsııalardyń áli de taralyp jatqanyn anyqtap otyr.
Bul aqparat shyndyqqa sáıkes kelmeıdi.
Ulttyq ekonomıka mınıstrliginiń habarlaýynsha, Úkimette mundaı salyq engizý máselesi qarastyrylyp jatqan joq.
- Qazaqstan Respýblıkasy Salyq kodeksiniń 430-babyna sáıkes, jeke tulǵalardyń banktik salymdary (depozıtteri) boıynsha alatyn syıaqysyna jeke tabys salyǵy salynbaıdy, – delingen mınıstrliktiń resmı habarlamasynda.
Osylaısha, depozıtter boıynsha syıaqyǵa salyq engiziledi degen málimdemeleriniń zańnamalyq negizi joq.
Eske salsaq Ulttyq ekonomıka mınıstrligi áleýmettik jelilerde tarap jatqan banktik depozıtter boıynsha paıyzdarǵa 5% salyq engizý týraly aqparattyń shyndyqqa janaspaıtynyn habarlaǵan edi.
- Salyq kodeksiniń 430-babyna sáıkes, jeke tulǵalarǵa bankterdegi salymdary (depozıtteri) boıynsha tólenetin syıaqylarǵa jeke tabys salyǵy salynbaıdy.
Úkimet bul normanyn kúshin joıý jáne depozıtter boıynsha syıaqylarǵa salyq engizý máselesin qarastyryp jatqan joq, - degen edi.
Aıta ketelik AÁK taǵaıyndaǵanda azamattardyń kredıti men depozıti eskeriletini týraly jazǵan edik.
