Depozıtterdiń dollarlanýy tómendeýde - Danııar Aqyshev

ASTANA. QazAqparat - Ulttyq valıýta jınaqtaý quraly retinde óz ornyn alýda. Mundaı pikirdi búgin QR Úkimetiniń selektorlyq rejimdegi otyrysynda QR Ulttyq banki tóraǵasy Danııar Aqyshev bildirdi, dep habarlaıdy QazAqparat.

Onyń aıtýynsha, depozıtterdiń dollarlanýy jyl basyndaǵy 55 paıyzdan tamyzda 50 paıyzǵa deıin tómendedi. Jyl basynan beri teńgemen depozıtter 6 paıyzǵa ulǵaıdy, al valıýtalyq depozıtter qaıta baǵalaý nátıjesinde, sol sııaqty naqty áketilýi esebinen 10 paıyzǵa qysqardy.

«Zańdy tulǵalardyń salymdarynyń dollarlanýy 2017 jylǵy tamyzda 45 paıyzǵa deıin, jeke tulǵalardyń salymdary 2017 jyldyń basyndaǵy 62 paıyzdan 57 paıyzǵa deıin tómendedi», - dedi ol.

Ulttyq bank basshysynyń sózine qaraǵanda, depozıtter boıynsha mólsherlemelerdi tolyǵymen naryqqa qatysýshylar aıqyndaıdy. Ulttyq bank tek eń kóp mánin belgileı otyryp, olardy rettemeıdi. 2017 jylǵy 1 shildeden bastap halyqtyń jańadan tartylǵan valıýtalyq depozıtteri boıynsha eń joǵary mólsherleme 2-den 1,5 paıyzǵa deıin tómendetildi.

Tamyzda jeke tulǵalar úshin teńgemen merzimdi depozıtter boıynsha ortasha mólsherleme 12,2, zańdy tulǵalar úshin 8 paıyz boldy.