Depozıtterdiń dollarlanýy 3 paıyzǵa tómendedi - Ulttyq bank
ASTANA. QazAqparat - Ulttyq valıýtadaǵy depozıtter 766 mlrd teńgege ósti. Bul týraly búgin Úkimettiń selektorlyq rejimdegi otyrysynda QR Ulttyq banki tóraǵasy Danııar Aqyshev aıtty, dep habarlaıdy QazAqparat tilshisi.
«Ulttyq banktiń altyn-valıýta rezervteri tamyzdyń sońynda 30,8 mlrd AQSh dollary, Ulttyq qordyń aktıvteri 56,5 mlrd AQSh dollary boldy. Jalpy halyqaralyq rezervter 87,3 mlrd AQSh dollaryn qurady», - dedi ol.
D.Aqyshevtiń aıtýynsha, 7 aıda depozıtter 3,6 paıyzǵa ulǵaıyp, 18,1 trln teńge boldy. Ulttyq valıýtadaǵy depozıtter 8,4 paıyzǵa nemese 766 mlrd teńgege ósti. Shetel valıýtasyndaǵy depozıtter 1,5 paıyzǵa nemese 128 mlrd teńgege qysqardy. Nátıjesinde, depozıtterdiń dollarlanýy jyl basyndaǵy 48 paıyzdan shildede 45 paıyzǵa deıin tómendedi.
«Kredıtteý naryǵy qalpyna kelýde. Bankterdiń kredıtteri shildeniń sońynda 13 trln teńge boldy. Statıstıka bankterdiń kredıttik portfeliniń ózgermeıtinin kórsetse de, sapaly ózgerister bolýda», - dedi bank basshysy.
Onyń sózine qaraǵanda, birqatar bankterdiń jabylýy jáne jekelegen ınstıtýttardyń qalypqa kelýi nátıjesinde kredıttik portfel 1,2 trln teńgege qysqardy. Bul ınstıtýttardyń kredıtteri endi eseptilikte kórsetilmeıdi. Alaıda, basqa bankter kredıttik portfelin 1,4 trln teńgege ósirdi.
«2018 jylǵy 7 aıda berilgen kredıtterdiń kólemi 28 paıyzǵa nemese 1,6 trln teńgege ulǵaıdy. Kredıtterdiń negizgi bóligi teńgemen beriledi. Ol 1,3 trln teńgeni quraıdy. Kásiporyndarǵa teńgemen berilgen kredıtter boıynsha mólsherleme 12,4 paıyzǵa deıin tómendedi», - dedi Danııar Aqyshev.
