Depozıtke 5% salyq salyna ma: mınıstrlik túsinik berdi
ASTANA. KAZINFORM — Áleýmettik jelilerde qazaqstandyqtardyń banktegi depozıtterinen túsetin syıaqyǵa 5% salyq engiziledi degen aqparat tarady. Ulttyq ekonomıka mınıstrligi bul málimettiń shyndyqqa janaspaıtynyn málimdedi.
Mınıstrliktiń habarlaýynsha, qoldanystaǵy Salyq kodeksiniń 430-babyna sáıkes, jeke tulǵalarǵa bankterdegi salymdary boıynsha tólenetin syıaqyǵa jeke tabys salyǵy salynbaıdy.
Osylaısha, qazaqstandyqtardyń banktegi depozıtterinen alatyn syıaqysyna 5% salyq engizý týraly aqparat — jalǵan.
— QR Úkimeti bul normanyn kúshin joıý jáne depozıtter boıynsha syıaqylarǵa salyq engizý máselesin qarastyryp jatqan joq, — delingen habarlamada.
Eske salaıyq, buǵan deıin bıyl Ulttyq bank depozıt mólsherlemelerin retteý saıasatyn jetildiretinin habarlaǵanbyz.
