Depardeniń daýy: Frantsýz akteri taǵy sotqa shaqyryldy

ASTANA. Kazinform – Tanymal frantsýz akteri Jerar Deparde Parıj qylmystyq soty aldynda jaýap beredi. Oǵan 2018 jyly áriptesi Sharlott Arnýǵa zorlyq-zombylyq jasady degen aıyp taǵylǵan. Bul týraly DW jazdy.

Sharlott Arný polıtsııaǵa 2018 jyly aryz jazǵan. Ol kezde aktrısa 22 jasta bolǵan. Arný akterdiń Parıjdegi úıinde eki ret zorlaǵanyn málimdegen. Deparde Arnýdyń ákesiniń dosy ekeni de aıtyldy. Tergeý uzaq ýaqytqa sozylyp, is sotqa tek jeti jyldan keıin jetti.

2020 jyly Arný taǵy da shaǵym túsirgennen keıin akter resmı túrde tergeýge alyndy. 2024 jyly prokýratýra isti sotqa jiberýdi surady.

Deparde taǵylǵan aıyptardy joqqa shyǵaryp, aktrısamen qarym-qatynasy ózara kelisimmen bolǵanyn alǵa tartady. Alaıda prokýror «aıypty rastaıtyn naqty dálelder bar» deıdi. Eger sot ony kináli dep tapsa, akter 20 jylǵa deıin bas bostandyǵynan aıyrylýy múmkin.

Bul Depardege taǵylǵan alǵashqy aıyp emes. 2025 jyldyń mamyrynda Parıj soty ony basqa is boıynsha – 2021 jyly túsirilim alańynda eki áıelge tıisý faktisi úshin – kináli dep taýyp, 18 aı shartty jaza taǵaıyndaǵan. Sondaı-aq ony jynystyq qylmys jasaǵan adamdar tizimine engizip, psıhologqa qaralýǵa mindettegen.

76 jastaǵy Jerar Deparde 200-den astam fılmge túsken. Biraq sońǵy jyldary ony jynystyq sıpattaǵy qylmystar úshin ondaǵan áıel aıyptap keledi.