Deparde reseı tólqujatyn aldy
ASTANA. 6 qańtar. QazAqparat - Frantsýz akteri Jerar Deparde Sochıde Reseı prezıdenti Vladımır Pýtınmen kezdesý ústinde reseılik tólqujatqa ıe boldy, dep habarlady reseılik «Jańalyqtar» agenttigi búgin memlket basshysynyń baspasóz hatshysy Dmıtrıı Peskovqa silteme jasap.
Kremldiń saıtynda habarlanǵandaı, Pýtın Depardemen 5 qańtar kúni keshke kezdesti. Peskovtyń aıtýynsha, kezdesý qysqa boldy. Onyń barysynda Reseı prezıdenti men frantsýz akteri sondaı-aq Deparde basty rólde oınaǵan Grıgorıı Raspýtın týraly kartınanyń reseılik prokatqa shyǵýyn talqylady.
Deparde Sochıge 5 qańtarda charterlik reıspen keldi. Reseı azamattyǵy oǵan 3 qańtarda berildi. Peskov muny akterdiń reseı kınematografyn damytýǵa qosqan iri úlesimen baılanystyrdy.
Depardeniń frantsýz azamattyǵynan bas tartatyny 2012 jyly jeltoqsanda - akter turaqty turǵylyqty orny Belgııaǵa ketkennen keıin belgili boldy. Depardeniń sheshimin baspasóz prezıdent Fransýa Ollandtyń mıllıon eýrodan asatyn kiriske 75 paıyzdyq salyq salý týraly usynysymen baılanystyrady.
Reseı azamattyǵyn alýyna túsinikteme bere otyryp, Deparde buǵan qýanyshty ekenin, óziniń reseı mádenıetin qurmet tutatynyn atap ótti. Ol sondaı-aq Reseı Prezıdenti Vladımır Pýtınmen de ózara syılastyqta ekenin aıtty.
Búgin frantsýz akteri Jerar Deparde Mordovııanyń astanasy - Saranskige keldi. Áýejaıda akterdi haldyq ánderimen jáne quımaqpen qarsy aldy. Deparde jınalǵandarǵa jańa reseılik tólqujatyn maqtanyshpen kórsetti. Budan keıin qalanyń kórnekti oryndaryn aralady.
Respýblıka basshysy Vladımır Volkov akterge qalanyń jańa qurylystarynan páterdiń kiltin tapsyrdy, sondaı-aq oǵan Insar ózeniniń jaǵasynda orman ishinen arnaıy úı salyp bermek.
«Rossııskaıa gazetanyń» málimetteri boıynsha Mordovıaǵa Depardeni onyń dosy - RF Memlekettik fılm qorynyń dırektory, osy respýblıkanyń týmasy Nıkolaı Borodachev shaqyrǵan. Deparde Saranskide Rojdestvo meıramynyń bastalýyna qatysyp, búgin túnde Tsıýrıhqa ushyp shyǵady.
