Densaýlyqqa salǵyrt qaraýdan týyndaǵan dertti emdegennen góri salaýatty ómir saltyn ustanǵan jón - dáriger T.Emberdıeva
ASTANA. QazAqparat - Aǵymdaǵy jyldyń 12 naýryzynan bastap elimizdiń barlyq aýmaǵynda «Uzaq ómir súrýiń óz qolyńda!» degen uranmen «Densaýlyqqa 7 qadam» atty marafon bastaldy. Osynaý aktsııa aıasynda qandaı is-sharalar josparlandy, el halqy medıtsınalyq mekemelerden qandaı kómek ala alady degen saýaldar jaýabyn «QazAqparat» tilshisine suhbat bergen Astanadaǵy №4 emhananyń dárigeri Tillágúl Emberdıeva keńinen tarqata aıtyp berdi.
- Tillágúl Rahmenberdiqyzy, osy aktsııa jaıynda tarqata aıtyp berseńiz
- Bul aktsııaǵa elimizdiń Densaýlyq saqtaý mınıstrligi bastamashy bolyp otyr. Shara azamattardyń óz densaýlyǵyn saqtaý men nyǵaıtý jaýapkershiligin arttyrý, salaýatty ómir saltyn ustaný qaǵıdasyn qalyptastyrý, ómir sapasyn kóterý men uzaq ómir súrýge yqpal etetin densaýlyqty saqtaýǵa daǵdylandyrýǵa baǵyttalǵan. Marafon sharty túrde 7 qadamǵa bólinip, sáýirdiń 7-ine deıin jalǵasatyn bolady.
- Marafon barysynda ana men bala densaýlyǵy máselelerine qatysty qandaı nazar aýdarylmaq?
- Aktsııanyń birinshi qadamynyń ózi osy otbasyn josparlaý, áıel men er-azamattardyń densaýlyǵy máselelerine arnalyp otyr. Osyǵan baılanysty bizdiń emhananyń bazasynda jumys isteıtin densaýlyq mektebinde otbasyn josparlaý jáne reprodýktıvtik densaýlyqty saqtaý máselelerine arnalǵan semınar-trenıngter uıymdastyrylatyn bolady. Sonymen birge emhananyń balalar bólimshesinde biz barlyq nıet tanytqan adamdardyń basyn qosyp, onda medıtsına qyzmetkerleri bolashaq analarǵa sábıdi emizýdiń, ımmýnoprofılaktıkanyń paıdasy jaıynda keńinen aqyl-keńes beredi. Buǵan qosa tyńdaýshylarǵa balalardy kishkentaıynan kútýge baılanysty keńester jazylǵan kómekshi quraldar men vaktsınalaýdyń ulttyq kúntizbesi taratylady.
- Marafonnyń kelesi bir qadamy nashaqorlyqtyń aldyn alýǵa baǵyttalyp otyr. Al sizder bul turǵyda qandaı sharalar uıymdastyrmaqsyzdar?
- Nashaqorlyq, erte jáne mezgilsiz júktiliktiń profılaktıkasy, AITV ınfektsııasy, reprodýktıvtik densaýlyqty saqtaý syndy máselelerdiń barlyǵyna da qatysty jaıttar boıynsha medıtsına qyzmetkerleri jasóspirimder arasynda uıymdastyrylatyn semınarlar barysynda keńinen aqparat beretin bolady. Jastarǵa tek qana dáris oqylmaı, sonymen birge is júzinde de kómek kórsetiledi. Olarǵa psıholog, dermatolog, venerolog, akýsher-gınekolog, ýrolog jáne basqa da mamandar keńes beredi. Semınarlar men trenıngter barysynda biz atalǵan taqyryptarǵa qatysty beınefılmder kórsetemiz. Budan bólek, marafon kezinde áleýmettik mańyzdy aýrýlardy erte anyqtaý úshin halyq arasynda aldyn ala tekserý sharalaryn ótkizý josparlanyp otyr. Sondaı-aq emhanada ashyq esik kúni ótkizilip, onda kardıolog, endokrınolog, gınekolog syndy túrli baǵyttaǵy mamandar qabyldaý ótkizedi.
- Bul aktsııanyń bastalǵandyǵyn halyqqa jetkizý jumystary qalaı júrgizilýde? Óıtkeni, kópshilik marafon jaıynda bilmeı qalýy da múmkin ǵoı
- Azamattardyń úı basyn tekserý barysynda olardy emhanalarǵa kelip, medıtsınalyq tekserýden ótýge shaqyramyz. Sonymen qatar biz emhanadaǵy radıo toraby arqyly kelýshilerge marafon jaıynda aqparat berip turamyz. Tolyqtaı alǵanda, marafon barysynda bizdiń kóptegen azamattarymyz ózderi úshin mol paıdaly keńester alyp, tipti keıbiri ózderiniń densaýlyqtaryn da túzeıtin bolady dep oılaımyn. Toq eterin aıtqanda, densaýlyǵyńa kóńil aýdarmaı, sonyń saldarynan týyndaǵan dertti emdeýden góri salaýaty ómir saltyn ustaný áldeqaıda jaqsy.
- Suhbatyńyzǵa rahmet!
