DENSAÝLYQ: Júkti áıeldiń tis kútimi
ASTANA. QazAqparat - Júktilik kezinde áıel aǵzasynda kóptegen ózgerister bolady. Onyń syry bolashaq ananyń boıyndaǵy dárýmenderge qursaqtaǵy náresteniń ortaqsýynda. Máselen, kaltsıdiń, ftor jáne fosfordyń jetkiliksizdigi - súıek pen tistiń bosaýyna, shashtyń túsýine alyp keledi. Nazarlaryńyzǵa júktilik kezinde analar marjandaı tizilgen tisterin saý kúıinde saqtaýdyń joldaryn usynamyz, dep jazady Massaget portaly Densaýlyq aıdarynda.
Tistiń beriktigi, aqtyǵy, saýlyǵy kaltsıdiń jetkiliksizdigine nemese shamadan tys artyq bolýyna baılanysty. Júkti áıelderdiń arasynda jıi kezdesetin qıyndyqtardyń biri - qyzyl ıektiń qantalaýy. Ony gıngıvıt nemese parodontoz dep ataıdy. Bul júkti áıelderdiń boıynda gormonaldi ózgerister saldarynan týyndaıdy. Eger tis tazalaǵanda şetkańyzdyń qanǵa boıalǵanyn kórseńiz dereý dárigerdiń qabyldaýyna barǵanyńyz jón. Maman tisińizdiń aýyrý sıpatyna qaraı qajetti em sharalaryn taǵaıyndaıdy.
Júktilik ımmýndy júıeni álsiretetindikten aýyz qýysynda mıkroorganızmderdiń ómir súrýine jaqsy jaǵdaı týady. Bárimizge belgili mundaı jaǵdaıda tis jegi, qyzyl ıek aýrýlary tez oryn alady. Der kezinde aldyn alyp, emdeýdi bastamasa tis jegisi júıke júıesiniń pýlpıtine nemese perıodontıtke alyp keledi. Kóńil bólmeı júre berseńiz, sábıdiń aǵzasyna ınfektsııa túsýi yqtımal. Al bul balanyń bolashaqta allergııalyq aýrýlarǵa beıim bolýyna alyp keledi.
Júktilik kezinde tis dárigerine barýdyń qanshalyqty durys ekendigi kez kelgen anany mazalaıtyny zańdy. Tis dárigerine júkti ekenińizdi eskertýdi umytpasańyz, qursaqtaǵy sábıge zııany tımeıtindeı barlyq ádisterdi qarastyrady.
Este ustańyz!
Jalpy júktilik kezeńinde stomatolog kabınetine bolashaq ana kem degende 3 ret barýy tıis. Alǵashqy bas suǵý - 20 aptaǵa deıin, ekinshi ret 20 men 32 apta aralyǵynda, úshinshi ret 32 aptadan soń.
Tis aýrýy mazalaǵan jaǵdaıda birinshi úsh aılyqta tek tis jegiden tazalap, plomba salyp, tisti tazalaý protsedýralaryn jasaýǵa ruqsat berilse, ekinshi úsh aılyqta rentgen zertteýler jasaýǵa bolady. Óıtkeni, bala aǵzasy bul kezeńderde syrtqy ortadan keletin qaýipterden qorǵana alady. Tek arnaıy rentgen sáýlelerinen qorǵaıtyn aljapqyshty áıeldiń ishine jabý kerek.
Júktilik kezeńinde quramynda adrenalıni bar dárilerdi salýǵa bolmaıdy. Sonymen qatar, aǵartý, protezdeý jumystaryn júrgizýge ruqsat berilmeıdi.
Tis dárigeriniń esigin jıi qaqqyńyz kelmese mynadaı qarapaıym aýyz qýysyn taza ustaý erejelerin este ustańyz:
1. Tisti kem degende kúnine 2 ret jýý kerek. Ár tistiń arasyn muqııat tazalap, taǵam qaldyqtarynyń qalmaýyn qadaǵalańyz.
2. Ár tamaqtanýdan soń aýyz qýysyn sýmen shaıyp otyryńyz.
3. Tispen qatar til, tańdaı, urtty da tazalaǵan jón.
4. Quramynda kaltsıı, ftor, fosfory mol taǵamdardy tutynyńyz.
Eń durysy, júkti bolmaı turyp stomatologqa kóringen durys. Aýyz qýysynda paıda bolǵan nemese paıda bolabastaǵan aýrýlardyń aldyn alý.
